Cord Drücker: Een Gorner, de mit Hartbloot achter sinen Beruf steiht
Dat weer dat Weekenenend in‘n Maimaand 2011, as Cord Drücker an‘n Sünnabend so as jümmer „Tschüss“sä to sine Kollegen in‘e Gorneree Melle. An‘n Maandag weer denn nix mehr so, as dat wesen weer. Günter Melle, de dat Leit harr, weer an‘t Weekenend sturven, un nüms harr dor mit rekent. De Dochter Carolin weer noch middenmang in ehr Studium; un so mossen Cord Drücker un sine Lüüd dat Leit van de Gorneree in ehr Hannen nehmen. Van den Bedrief, de up‘n bannig goden Weg weer un, geiht dat um Heideplanten, to den gröttsten in Düütschland tellt. Al as de utkäken Juniorchef Patrick Melle 2006 mit‘n Maal na Guntsiet gahn, hett Günter Melle Cord Drücker an sien Siet nahmen: „Du büst nu de, mit den ik toeerst to snacken heff!“Günter Melle wuss dat nipp un nau: „De is Gorner döör un döör.“Dat Cord just hier sinen rechten Weg fund, dat hett he sinen Öllern to verdanken. Upwuusen is he in dat Dörp Kühlingen, dor harrn sine Öllern ene Buureree. Appels,
Beern, Plumen un Grööntüch wurrn up‘n Weekenmarkt in Bremen-Vegesack verkofft. Geern is he mit de Öllern mitkamen. För em stund fast: „Ok ik ward Buur.“„Us Hoff is to lütt“, menen sine Öllern. Sien eerstet Schoolpraktikum maak he bi de Gorneree Melle, de to de Tiet noch in de Gruppenbührener Straat in Ganderkesee ehr Tohuus harrn. „Dor hefft mien Öllern an dreiht!“, dat weet Cord noch. Günter Melle hett gau markt: „Disse Praktikant hett de rechten Hannen för Planten.“Dat tweete Schoolpraktikum gung in‘n „Gasthof zur Linde“in Kühlingen över de Bühn. „Ik heff dor nich bloots de Glöös mit Beer vull maakt, ok Schnitzel droff ik „kloppen“un Appelkoken backen.“As Günter Melle dor Wind van kreeg, hett he foors mit em över dit Praktikum snackt: „In‘n Kroog stahn? Wullst du eernsthaftig up dissen Padd lopen?“Günter Melle wull dissen jungen Keerl, de doch so recht wat in‘n Gaarn beschicken kann, nich an de Gastronomie verleren. Cord harr dor‘n apen Ohr för un maak bi
Melle sien Lehrtiet as Gorner, besünners harr he dat mit de „Zierpflanzen“to doon. Bit vandaag is he sik dor heel seker, dat dat de rechte Weg för em weer: „Stah ik an‘n Morgen up, freu ik mi up de Arbeit, un dat is bit nu nich anners wurrn!“Na sien Lehrtiet bleev he bi de Gorneree Melle, denn disse Bedrief weer em an‘t Hart wussen, un dat weer so as sien tweetet Tohuus. De Philosophie van sinen olen Chef hett ok Cord to sien Philosophie maakt: „Bi allns, wat wi Dag för Dag doot, steiht de Plant ganz babenan!“- Carolin Melle hett vör fief Johrn dat Studium achter sik brocht un is siet disse Tiet vull mit in de
Firma. „Cord is een Mann för allns, un he wiest bannig veel Gröte, geiht dat um de Minschen um em to“, dat weet Carolin Melle över ehre „rechte Hand“to vertellen. Nich alleen sinen Droom as Gorner kunn he in de Firma Melle wohrhaftig maken, hier hett he ok Julia kennen lehrt, mit de he dat Leven deelt. Fraagst du em na Hobbys, so lett di Cord weten: „Dor is nich veel Tiet för, denn just in de Sommertiet sünd us Ogen un Hannen bi de Planten, un de mööt ok an‘t Weekenend ehr Recht kriegen!“Un wo sütt dat mit‘n egen Gaarn ut? „Den heff ik an mien Julia un an mine Öllern afgeven.“