Henning Wessels: Een sööt Hobby, dat di gefangen nimmt
Wenn’t um Honnig un sine Immen geiht, lett Henning Wessels ut Nordenham-Kloster in‘n Landkreis Wesermarsch allns stahn un liggen. Un dat weer doch‘n Tofall, dat he up dit sööt Hobby keem. Sien jünger Broor Hergen harr den Buurnhoff van de Öllern övernahmen un fund 1996 in de ne‘en Bundeslänner för sien Buureree een ne‘et Tohuus. Henning hulp sinen Broor bi‘n Umtog, un bi disse Gelegenheit wurd he up‘n Böön Immenkastens wies, denn al Vadder un Grootvadder harrn Honnig van de egen Immen krägen. „Al länger harr ik den Gedanken, sülfst dat mit de Imkeree to versöken“, verklort Henning Wessels. Sien Intress snack sik in de Familje rum, un van sinen Unkel Theo kreeg he de eersten beiden Völker. „Ik harr vanwegen minen Beruf nich veel Tiet un van de Imkeree wuss ik rein gor nix“, mutt Henning Wessels togeven. Twee Johr lang keek he sik sine Immen nip un nau an, un sinen Unkel seeg he över de Schullern. „Je mehr ik över de Immen lehren kunn, um so mehr hefft de mi gefangen nahmen“. He wurd Maat bi‘n Imkervereen Butjadingen, un hier weer de ole Vörsitter Horst Kohlrenken för em een groot Lehrmeister. 2004 gung de Vörsitterposten van Horst Kohlrenken an Henning Wessels wieter, un he harr söss Johr later de Fusion mit‘n Imkervereen Brake up‘n Weg brocht. Bit vergangen Johr weer Henning
Wessels ok de Vörsitter van den ne‘en „Imkerverein JadeWeser e. V.“. Dat ok junge Lüüd up‘n Padd van de Imkeree kaamt, dat freut Henning besünners: „Weern de Hobbyimker vör‘n paar Johren mehrst öllere Mannslüüd, so sünd nu ok faken jüngere Lüüd dor mit bi. Un dor kannst du di över freun, dat rund so‘n Veertel van de Maaten Froolüüd sünd“. De „Imkerverein Jade-Weser“bütt Lehrkurse an för all, de in de Imkeree instiegen willt. Imker Uwe Rieken gifft all dat an Weten wieter, wat ne‘e Imker bruukt. „Ok wenn elkeen dat mit de Immen versöken dröfft un Honnig arnten kann, is dat beter, de Imkeree rejell to lehrn“, verklort Henning Wessels. Bi em sünd ut twee Völker nu al teihn wurrn. Un dorbi genütt he dat , in de fre‘e Natuur to wesen, so as dat al in sien Kinner- un Jugendtiet weer. In de groten Ferien weer he faken bi een Förster in‘n Harz. „Förster, dat weer männigeen Johr lang de Beruf, de bi mi ganz baben stund“, dat weet Henning Wessels noch. Man dat keem anners: As he de School achter sik harr, schull he eerst maal up een Handwarker lehrn. He lehr in Nordenham up Mürker. Man de Dokter van dat Gesundheitsamt hett foors seggt: „Lehrtiet ja, awer mehr nich. Dien Rüch, de maakt dat nich mit“. Al to sien Lehrtiet besoch he an‘n Abend Kurse in de „Berufsaufbauschule“. Na de Lehrtiet gung dat na Lohne to de „Fachoberschule“; un achteran studeer he in Buxtehude up Ingenieur. Al in sien Lehrtiet bewunner he den Architekten Günter Baumann ut Nordenham. An‘n 28. April 1974 bewarv sik Henning Wessels, un veer Daag later kunn he bi Günter Baumann anfangen. De wull 1980 een ne‘et Leven in Indien beginnen, un so hett Henning mit‘n Kollegen tohoop Baumann sien Architektenbüro övernahmen. Een „Lieblingsprojekt“för em weer 1990 dat „Morgenstern Museum“(Historisches Museum) in Bremerhaven. Siet dree Johrn hett he dat Leit van dat Architektenbüro tohoop mit sien Dochter Silja.