„Dinen Job muttst du leven, un ok leev hebben“
Stefanie Grundmann: Van Peking na Gannerseer
„In dinen Job muttst du leven, un em ok leev hebben“, seggt Stefanie Grundmann, un se is mit ehr Hart vull un ganz dorbi. Siet teihn Johrn höört se to dat Team van „Garten- und Landschaftsbau Kreye“in Gannerseer, dat best upstellt is un in dit Johr dat 25-Johr-Firmenjubiläum fiert. Jümmer woller hett se de Kunnen mit ehr Ideen up ehre Siet, wenn de‘n ne‘en Gaarn anleggen willt oder‘n Gaarn een anner Gesicht geven willt. Stefanie Grundmann is mit ehr Doon best tofräden, man dorbi gung toeerst de Tokunft, wenn‘t um den rechten Beroop geiht, in een anner Richt. Upwussen is se in Selm, een lütt Stadt in Nordrhein-Westfalen. Al as lütt Kind harr se een Hart för Päär. Se weer in dat Dressurveereck just so to Huus as bi dat Utbilden van de Päär. Vele Johr geev dat för ehr bloots School, Huusupgaven un Päär. „Dat is faken nich ganz eenfach wesen“, seggt Stefanie dorto. Ok wenn‘t um enen Beroop geiht, wuss se wat se wull: Na‘t Abitur een Utbilden as „Tierarzthelferin“, achterna up „Tiermedizin“studeern. In den Bedrief, wor dat Utbilden lopen schull, maak se vörweg een Praktikum. „Hier moss ik meist nix anners doon as putzen un plätten“, vertellt Stefanie. Mit hangen Kopp keem se na Huus un meen to ehr Öllern, de dat gor nich geern höört hefft: „Dor gah ik nich woller hen“. Disse Beroop weer an‘e Siet schaven. Se harr sik van ehren Broor den Computer utlehnt un soch, wat se denn anners woll maken kunn. Görner un hier de Richt „Garten- und Landschaftsbau“, dat kunn woll wat wesen. Bi de Stadt Dortmund kunn se de Lehrtiet maken, un se harr hier överall in dat Kuntrei van de Stadt wat to doon. Elkeen Morgen weer för ehr Klock fiev de Nacht vörbi, man se harr likers bannig veel Spaaß an ehr Arbeit. De Leevde to de Planten weer woller dor, harr doch al in‘e Kinnertiet de Mudder ehr all de velen Planten in den egen Gaarn verklort. Na de Lehrtiet studeer se af 2004 in Osnabrück an de Fackhoochschool. De Idee, een Utlandssemester up‘n Weg to bringen, keem ehr in‘e School an dat „Swarde Brett“. Dor wurd ok een Praktikum in Peking anbaden. Foors keem bi Stefanie dat Füür hooch. In‘n Maimaand 2008 gung‘t na China, na dat Land, wor de Sünn upsteiht. Hier kunn se in een „Planungsbüro für Gartengestaltung“ehr Hannen rögen, un een ganz besünner Projekt
Stefanie Grundmann
weer de „Dachbegrünung“. Noch vandaag kann se best vertellen över de Chinesen, de bannig fründlich to ehre Gäste sünd. Tohoop mit Frünnen weer se to‘n Bispill dor ok bi de Olympisch Spelen 2008 in Peking mit bi, un se kunn dat 100-Meter-Finale mit Usain Bolt vör Ort mitbeleven. Na söss Maand Praktikum keem se torüch na Düütschland un maak ehren Afsluss an de Fackhoochschool, un an‘n 1. Februarmaand 2009 gung dat torüch na Peking. Woller fund se Arbeit in dat „Planungsbüro“. Man nu weer se dor nich mehr as Praktikantin, se droff sik „Diplom-Ingenieurin“nömen, de dor up studeert harr. Een Johr wull se in Peking blieven, man ut dat ene Johr wurrn denn doch twee Johr. Al in ehr Tiet in Peking weer se dor up daal, in Düütschland in ehren Beroop wat to finnen, wat se na vörn bringt. Een Unnernehmen in Köln weer nix för ehr, awer „GaLaBau-Kreye“in Gannerseer, dat weer wat na ehr Mütz. Siet Februar 2011 hett se hier Projekte in ehr Hannen. Dat fangt an mit dat Anbeden un geiht wieter mit dat Planen. Achteran hett se dat Leit van de Boostää, un ok dat Afreken liggt in ehr Hannen. Se lifft in ehren Job, un se hett em leev, man ok mit de Planten steiht se up „Du un Du“. Dat kann ehr egen Gaarn best wiesen, in de bloots Planten wasst, un‘n Rasen bruukt se nich.