Lewe Läser!

Lang harrn wi tohoop in de NWZ warkelt. Man denn gung elkeen sinen egen Weg, as de Kolleeg wat Ne‘et up een anner Rebett maken wull. As ik em na een Johr – de Tofall wull dat – woller in‘e Mööt keem un fraag, wo dat denn nu so an sine ne‘e Arbeitsstää is, weer he woll tofräden. Man dor weer noch een Woort, wat bi mi hangen bläven is: Weetst du, wat mi jichtens fehlt? Dat is dat gode Föhlen na Fieravend, dat du över Dag ene Saak goot un vull un ganz to Enn brocht hest. De Zeitung, de du klor krägen hest, free gäven för den Druck, dat wies us, wi harrn wat up‘n Weg brocht. Un dat mit‘nanner.

Dor is veel Wohrheit in. In dat Johr 2021 is de Journalismus för‘n Regionalblatt anners wurrn. Dat is een „24/7– Geschäft“över Kanäle, de bannig verscheden sünd un nu ok digital; un likers is de Arbeit an‘e NWZ jümmer noch dat: Een Wark, dat wi in‘n Team up‘n Weg bringt, nipp un nau to‘n fasten Termin.

In anner Branchen maakt man sik in Arbeitskoppels Gedanken över „Konzepte“, dat dor wat an‘n „Reißbrett“bi ruutsuurt. Man bi een Zeitung löppt meist allns Dag för Dag intuitiv: Een Rad grippt in dat annere, all 24 Stunnen nee, ofschoonst de ne‘en Narichten, de jümmer woller verscheden sünd, Dag för Dag enen annern Grund leggt.

Elkeen weet, wat to doon is, ahn dat wi dor lang över snacken mööt. Dag för Dag stüürt wi bi de NWZ den rechten Weg so an, dat wi us dat allns heel un deel döör‘n Kopp gahn laat. Man jümmer geiht dat gau, faken in‘n Minutentakt. Elkeen Dag een ne‘e Zeitung unner de Lüüd to bringen: Dat is dat, wat us Journalisten andrievt.

Wi willt us Läsers kunnig maken; Lecht bringen in dat, wat in‘n Achtern so‘n beten in‘n Dustern liggt; un ok wat anbeden för den Tietverdrief. Vandaag – so as siet 75 Johr – un in de tokamen Tiet: Jümmer passeert just so veel, as wi dat in us Blatt unnerbringen köönt. All 24 Stunnen. - Un wat dor anners noch is, dat leest wi den Dag lang up „NWZonline“.

Ik grööt jo van Harten! stv. Chefredakteurin Nordwest-Zeitung