„Ik lehr up Görner – dat is klor“
Timo Lankenau: As Een-Mann-Bedrief fung allns an
Timo Lankenau is in dat lütt Dörp Charlottendorf-Ost (Gemeende Wardenburg) upwussen, un so seggt he dat sülfst: „Een Jung van‘t Dörp döör un döör.“As dat in een Dörp so is, mit de Naberskinner tohoop geev dat‘n Barg to befummeln, un nich jümmer kemen bi de Groten disse „Aktivitäten“best an. An enen Dag maken Timo un sien Frünnen bi de lütt Bäke in‘t Dörp enen Stau, un so keem dat Water över de Över. De Grootöllern van Timo harrn noch een Buureree, siet 33 Johrn sien Tohuus. Disse Buureree hefft se middelwiel togäven; man de grote Gaarn, de is dor noch. „Hier heff ik mien Öllern geern hulpen. Arbeit in‘n Gaarn maakt veel Spaaß“, vertellt Timo. Al in jungen Johrn leet he sik dat Rasenmeihn nich nehmen, veel to geern seet he up den „Aufsitzmäher“. Sine Been kemen just na de Pedale hen, do seet he al up den groten Slepper un föhr up‘n Hoff sine Runnen. In dat Öller van twölf Johrn wull he up Naberschupp bi Boomschool Addicks sien Taschengeld‘n beten grötter maken. Mit de Wöör „Dor büst du noch to jung för!“wurd he woller na Huus schickt. Een Johr later droff Timo de lütten Setzlinge in de Eer steken. Man de Tiet keem, do weer em dat to minn: „Ik wull
Timo Lankenau
mit na buten un mit anpacken.“„Denn willt wi maal sehn, wat du kannst“, meen een van de Vörarbeiters. De wunnern sik nich slecht, wo Timo anpacken kunn. „Dat hett bannig veel Spaaß maakt, awer an‘n Avend bün ik doch mööd in‘t Bett fullen“, so weet Timo to vertellen. Al in de Grundschool stund för em fast: „Ik lehr up Görner, dat is doch klor.“Dat weer ok, as he de School achter sik harr, nich anners. Man he moss ok wat van de wirtschaftliche Siet verstahn, nich bloots wat van de Praxis, un so besoch he eerst maal de „Fachschule Wirtschaft“in Ollnborg. Up Görner lehr he achterna bi de Boomschool Addicks, em al best bekannt. Noch vandaag kann Timo över disse Tiet best snacken: „Disse dree Johr hefft sik bi mi ingraven. Bannig veel heff ik hier för dat Leven, wat achterna up mi to keem, lehrt.“Ofschoonst em dat in sinen Lehrbedrief best gefull, wull Timo ok in anner Unnernehmen noch wat tolehrn. Ne‘e Arbeit fund he bi Jeddeloh in Jeddeloh, een van de gröttsten Boomscholen in Europa. Na een Johr studeer he eerst maal up Meister in sinen Beroop. Mit‘n Meisterbreef in de Tasch gung dat 2015 torüch in den Bedrief van Jeddeloh, un hier stund he ganz vörn, wenn‘t um de Rosen gung. Een Gedanke weer dor jümmer mit bi: De Dag schall kamen, do will ik as „Gartenund Landschaftsbauer“up egen Been stahn. An‘n 1. in‘n
Aprilmaand 2017 meen Timo denn: „Ik versöök dat maal un fang as so‘n lütt Een-Mann-Bedrief an.“Sien gode Arbeit hett sik gau rumsnackt; un dat dat dor nich genoog to doon geev, dat kunn Timo nu just nich bejammern. Sien Arbeitsdag fung an‘n Morgen Klock säben an un fund faken eerst an‘n Abend so bi Klock ölven lang sien Enn. So kunn dat nich wietergahn. Na dree Maand keem de eerste Helpsmann. Middelwiel sünd dat nägen Helpslüüd, un Timo will sien Team noch grötter maken. Den Sommer 2018 ward Timo Lankenau so gau nich vergeten. Hier keem nich bloots de eerste Lehrjung in sien Team, in dat Büro fung ok Bianca Stenzel an ehr Hannen to rögen. Middelwiel is Bianca in‘n Bedrief nich bloots de „rechte Hand“, se is ok de Deern an sien Siet. Privat un Firma, dat kunn woll nich beter lopen.