Sien egen Chef mit 19 Johrn
Sven Schliep hett sinen Droom umsett
19 Johr oolt weer Sven Schliep, un he weer sik seker, up‘n rechten Padd to lopen. He gung na sinen Chef in‘t Büro un meen: „Ik will up mien egen Fööt stahn un bloots noch een half Week lang hier wat doon. De anner half Week bruuk ik för mien Firma.“„Wo wullst du dat denn maken?“, hool sien Chef dorgegen, un he weer doch inverstahn. Denn gung allns bannig gau. Noch in de sülvige Week harr Sven mit sinen Fackmann för de Stüürsaken allns klor krägen un sien Firma in‘n Aprilmaand 2018 anmeldt. Mit „Gartenbau Schliep“un „Wir blühen für Sie auf“weer nich bloots‘n Naam för de Firma gau funnen, dat weer ok de rechte Wiespahl. Gode Arbeit snackt sik rum, un so keem männigeen Updrag up em to. Al na‘n paar Maanden harr he so veel Kunnen, dat he af 2018 de Hannen bloots noch för sien EenMann-Unnernehmen rögen kunn. In de Wintertiet is de Arbeit in‘n Gaarn ja just nich anseggt, un so weer he in disse Tiet bi den „Baumpflegebetrieb“van André Bischof in Stellung. „Dat hett mi veel Spaaß maakt, un to glieker Tiet heff ik bannig veel över dat Afslaan un dat Plegen van Bööm lehrt“, vertellt Sven Schliep. Un babenup hett he Kurse för Klatteree mit‘n Reep besocht. Dat Johr 2021 is nu wieter‘n Mielensteen för dat junge Unnernehmen. In dit Johr kunn he sinen eersten Helpsmann instellen. He kann nu allns anbeden, wat dor to‘n Gaarn tohöört, un ok dat Afslaan un dat Plegen van Bööm mit de Hülp van de „Seilklettertechnik“. Bi so‘n breet Spektrum kann dat woll nich mehr lang duurn, un de neegste Helpsmann kummt dor in dat Team to. Sven Schliep kunn al in jungen Johrn sinen Droom umsetten. Kien Wunner, harr he doch jümmer liekut käken, denn al in jungen Johrn wuss he: „Ik ward Görner“. As sine Öllern bi‘n „Kleingartenverein Waterende“sik een Parzell toleggen, harr de junge Sven, to de Tiet twölf Johr, Füür fungen. Een Naber van de Parzell harr em Moot maakt, Grööntüüch antoboon. Sine Öllern meenen dorto: „Du maakst dat al.“100 Quadratmeter wurrn van‘n Rasen wegnahmen, un nu kunn Sven wiesen, dat he dat Anboon van Grööntüüch best kunn. För em weer dat een eernsthaftig Saak, un he maak sik eerst maal‘n Plan, wat he wor planten wull. För Tomaten un Gurken maak he sinen Sporpott loos un koff‘n lütt Gewächshuus. Düngen mit Chemie un Sprütten weer nich sien Ding. Veel Leevde, veel Arbeit mit de Hannen un sik veel Tiet nehmen för de Planten broch em as Verdeenst een grote Arnt. „Anfängerglück“, smustergrient Sven. As he de School achter sik harr, weer dat mit dat Anboon van Grööntüüch ok
Sven Schliep
vörbi. Nu stund de Weg in enen Beroop ganz vörn, un up sinen Wiespahl stund: „Ik lehr up Görner.“De Lehrtiet broch em na „Blumen Lüschen“in Ollnborg, un sien Richt weer: „Zierpflanzenbau“. „Mit Ralf Wilken harr ik de besten Chef van de Welt“, vertellt Sven noch vandaag bannig geern. Een groot Deel van sien Arbeit in‘n Lehrbedrief weer dat ok Gaarns to plegen, un hier weer Sven so recht dor mit bi. Man Sven wull noch wat tolehrn, un so wessel Sven na de Lehrtiet na een Firma för „Garten- und Landschaftsbau“. Nu weer he sik ganz seker mit den Wunsch, in sinen Beroop up de egen Been to stahn. Un dat hett Sven Schliep denn ok daan, un dat mit 19 Johrn. So recht na dat, wat up sinen Wiespahl steiht: „Was du heute kannst besorgen . . .“.