Flöck löpt de Ziet

Dä alde Wellem Busch hät nit bloß dat Mäuzke von Max on Moritz jeschreewe, däm send och janz öwerschlaue, sozesare beinoh fillosofische Spröch enjefalle: „1-23 em Sauseschrett, et löpt de Ziet, mer loope met!“

On wie mer am loope send! Häsde-nit-jesenn send de Weihnachtesdaach eröm. All de Jeschenke usjepackt, de Weihnachtsjans verkimmelt, de Plätzkesdos leer, et Jewecht vill zo vill, on de Verwandtschaff widder fott. (Och wenn et dies Johr bloß fönnef Lütt mieh woren!) Do deht mr eesch emol widder feststelle, wie lecker jemötlech et sin kann, wenn mr widder onger sech es.

So ‘n kleene Paus deht joot. „Zwesche de Johre“hät min

Omma selech emmer jesaht för de Ziet von Weihnachte bes Silvester. Fröher sollt mr en der Ziet sech fiese Brassel vom Liew halde on sech en fuule Ziet jönne on ene Hoope Kawuppdesch sammele, öm för em neue Johr widder met Schmackes ahbiede zo könne. Wat de Lütt fröher jekonnt hannt, dat könne mer doch hütt och, wör doch jelacht wenn nit! Em Sauseschrett es de Ziet erömjejange bes Silvester, on dat met janz vill Nixdonn. Dobei es eenem ehrlech jesaht dat „Chille“zweschedörch och janz lecker op’m Driss jejange. Denn en so’nem fies-fade „Lockdown“kannsde eejenslech janix donn. De Silvesterparty hät usfalle mösse on dat Katerfröhstöck jester am Neujohrsmorje och.

Hammer denn dies Johr dat fuule Päuske zwesche de Johre janz för ömmesöns jemaht? Nä, hammer nit! Joot, dat mer am chille woren öm em neue Johr widder en de Häng zo speue! Wenn mer bald widder dä Stress mem „home-office“on „home-schooling“am Been hannt, dann wören mer ohne Kawuppdesch fies opjeschmesse.

Monika Voss