Rheinische Post – Düsseldorf Stadt
Sommerziet widder do
Dies Nacht mösse mer de Uhre ömstelle. Jedes Mol ben ech wie so e Tutedöppe am hen on her simoleere, ob ech dä Zeijer aan däm Erwstöck von de Omma selech, de antieke Standuhr (mem Westminster-schlach!) noh vöre odder noh henge driehe soll. Also, vör wenn de Sommerziet kütt on retuhr, wenn se am Äng es. Ech well op keene Fall morje verschlofe, wenn de janze Famillich schonn dat Sonndaachsfröhstöcksei am opkloope es, ohne dat ech met de Nas dobei ben. Och wemmer hee em Huus och Funkuhre on automatesche Händywecker hannt, donn ech sozesare profülacktesch min alde Armbanduhr per Hangk schonn ömstelle, bevör ech hütt Owend ennet Heiabett jonn. Dann bruch ech nit medde en de Nacht all ons automatesche Uhre zo inspizeere, ob se och braw von zwei op drei Uhr jejange send. Jenau bekickt deht ons de Sommerziet morjens een Stond klaue. Morjemuffel send nu am kühme, weil se morjens nit trek met Kawupp ussem Bett höppe, sondern sech jähn länger onger'm Plümoh räkele. Angere Nörjelspitter meckere, wat dat Zietömstell-jedöns öwerhaups soll, on Sturköpp, Modell „Kwerdenker“, wolle sech nit von owe vörschriewe losse, wann se opzostonn hannt. Dat künnt doch jeder selwer bestemme, meene se. Prima, make mer ons doch nohm eejene Justo de Sommer- odder Wenterziet! Noh däm Motto: Bruche mer nit, fott domit! Wenterziet adschüss! Ech hädden nix dojäje, wenn dat janze Johr Sommerziet wör! Ehr och? Monika Voss