Projramm en de Jlotzkest

Bei däm bedröppelde Wähder en de letztde Woch hät mr mieh vör de Jlotzkest jehockt als wie söns. Nä, wat kann mr sech do för ene Mumpitz aankicke! Aanjefange mem rösije Zwirbelschnäuz, bei däm mr antieke Krempel verkloppe kann, öwer witzije Schwahdlappe, jenannt Kwizmaster, bei denne mr sech blameere odder Moppe jewenne kann, bes noh Krankehuus-serije, wo jede Medikus een Wonderheilong noh de angere op de Been stellt. Nit zo verjesse de Talkshows, wo een Schnabbelschnüss met de angere öm de Wett am kwassele es.

Äwer dann kütt dä Rest! On dann esset met de Jemötlechkeet am Äng. Et jeht doch nix öwer so'ne Tv-krimi! Ejal ob Soko odder Tatort, Hauptsach et es e Verbreche, wat sech jewäsche hät! Hauptsach, mr es zohuus op'm Kanapee vör Spannong met am zeddere.

Bes endlech dä schlaue Komissar em Alleenjang odder dat jeniale Team von de Soko dä Drecksack jeschnappt hät. Dat Äng vom Leed kann äwer och angers ussenn: Mörder*in wöhd op de Flucht erschosse, wat en däm janze Dörchenanger bei so'n Verfoljong passeere kann. Dä treffsechere Schötz süht dann äwer trek schwer metjenomme us on brucht dann flöck ene Psücholore.

Kickt mr sech dat TV-PROjramm aan, es mr am staune, wo et öwerall Sokos jöwt, on jede Woch es widder e Verbreche opzokläre. Wenn dat Realität wör, wöhd ech mech nimmieh traue noh Wismar odder Rosenheim zo fahre. Do heeß et jede Woch: Mer hannt widder en Leich! Nä, ech hann von Tv-krimis de Nas voll! Ech kick mech bei Räjewähder leewer en Romanze vom Pilchers Röske aan.