Lommer op Distangs jonn

Nä, wat wor et fröher vör de Pandemie schön, wenn de Lütt sech bejrößt hannt! Kannsde dech noch erennere? Mr wor sech öm dr Hals jefalle on sech am ömarme, als wenn mr sech siet Johre nit jesenn hädden odder jrad von en Weltreis widder retour jekomme wör. Besönders jelonge wor et emmer dann, wenn mr däm Jäjeöwer janit verknuse kunnt, äwer trotzdäm aan so'nem oblijatoresche Bützke nit vörbeikohm. So'n Bejrößongszeremonie kannsde hütt verjesse.

Et jöwt jo nix, wat bloß schleiht es! Dat Joode aan däm Virus-jedöns es jetz, dat mer ons dä janze Schmus von Ömarmonge, Knuddele on Bützerei afschmenke könne. Sojah de Häng bruche mer ons nimmieh zo schöddele. Weeßde noch, wat dat för e fies Jeföhl wor, wenn dech eener sin verschwitzde Hangk schlaff wie'ne wärme Wäschlappe jejäwe hät? Dat es nu Jottseidank nimmieh Usus. Stattdesse deht mr hütt met Schmackes Fuust aan Fuust dröcke odder lösst Ellebore aan Ellebore titsche. (süht mr hütt jähn bei kernije Politickers) So kann mr och nix verkehrt make, wat dä nödije Afstand aanjeht. Lommer leewer op Distangs jonn, dann kann och kinne fiese Virus von eenem op dä angere höppe. Well mr öwerhaups kinne Körperkontackt hann, dann jenöcht och ene Blickkontackt, on mr säht leger on lässech bloß: Hi odder Hallo! Domet mr eesch janit en Versöhkong kütt wie fröher, anger Lütt de Hangk jäwe zo wolle, lösst mr am beste de Häng en de Buxetäsch, wat besönders cool ussüht bei Mannslütt.

Jrad ben ech am öwerläje, wie ech morje beem Famillichtreff de janze Bajahsch bejröße soll. Letzdes Johr semmer ons noch all öm dr Hals jefalle, on selws de jrößde Krabitz hät e Bützke jekritt. Nä, ech komm em elejante Buxeaanzoch, Häng en de Täsch on donn bloß flöte: Hallöche all zosamme!