Pähdsstähz odder Pläät

Ech hann noch hütt de Stemm von minnem Papp selech en de Ohre: „Däm Kähl moss sinne Frisör jestorwe sinn!“Dat hätte emmer jesaht, wenn eener met zo lange Hoor öm de Eck kohm.

Mech fällt dä Satz emmer en, wenn ech mech hütt Schlarersänger wie Wolfjang Petry odder Hansi Hinterseer aankicke moss. Dojäje fällt mech beem bajuwaresche Polliticker Anton Hofreiter janix mieh en, dä met sin Hoor ussüht, wie ussem Meddelalder entspronge.

Em Momäng hammer jo en besöndere Sittewazzjohn! On jetz bliewt ons Männer janix angeres mieh öwrech als wie met seldene Frisürkes erömzoloope. Dä Fijaro es nit jestorwe, dä darf bloß nimmieh brassele on moss sinne Salong zohalde. Nix met Schnibbele, Style on Föne!

Dä Drickes-Dustin hät schon vöre Welle on henge krengele sech de Löckskes öwer’m Hempkrare, wie op däm Fotto von sinnem eeschde Scholldaach. Bloß dat de Locke domols strühblond wore, äwer hütt wiss.

Dä Sven-Döres es froh, datte kin Locke, bloß jlatte Hoor hät, on die hätte sech jetz henge zosammejebonge als - platt jesaht – Pähdsstähz odder vörnähm usjedröckt wie däm Lagerfelds Karl sinne elejante Zopp. Nä, wat hannt so Kähls et joot, denne dä Kopp als lang dörch de Hoor jewachse es, d.h. en Pläät hannt. Kin Maläste mem Frisürke on denne esset jetz och drissejal, ob dä Fijaro widder opmake kann odder nit.

Öwerhaups send hütt jo kahle Köpp rongkeröm trendy on cool! Schonn lang loope jonge Mannslütt janz freiwellech met en Pläät eröm. Do fällt mech jrad noch ene Spruch en: Besser en Pläät als wie ja kin Hoor!