Nowämber nit wie söns

Miesdens es dä Nowämber bei ons rongkeröm düster on fies usselech nass. Ki Wonder, dat et Sensibelches jöwt, denne dä Nowämber ärch op et Jemöt jeht. Schonn morjensfröh, wemmer en dat Räjewähder eruskickt, künnt mr dat ärme Dier kreeje.

Hät dech sojet am Schlawittche, häsde dä beröhmde „Nowämber-Blues“, ohne ene englesche Usdrock löpt hütt nix mieh. Also, dat ärme Dier es „out“, dä Blues es „in“. Bes dato hannt Lütt hee von de Düssel sech äwer nit so flöck met däm Blues infizeere losse. Bei däm Wohd „Blues“hann ech emmer dä New-Orleans-Jazz ussem „Pöötzke“(wat leider de Pootz zojemaht hät!) em Kopp jehatt on et Kribbele en de Fööß, öm för trek mem Danze aanzofange.

Doch dies Johr em Nowämber mösse mer ons Danze on Höppe aan et Höötche stecke on noch vill angeres mieh. Ech well jetz hee janit schwazz op wiss opzälle, wat mer ons jetz en däm Lockdown alles afschmenke könne. Dann hädden ech nemmech beem Schriewe schonn en dicke Depressjohn am Hals. Nä, jank mech fott met Nowämber-Corona-Blues! Ech loss jetz nit bedröppelt minne Kopp hänge! Weeßde, wie flöck veer Woche eröm send? Wör doch jelacht, wenn mr sech dä Nowämber nit och drenne em Huus lecker jemötlech make künnt! Häsde dat kulinaresche Highlight em Restorang schonn afsare mösse, dann lösst mr sech dat leckere Jänske eenfach noh Huus brenge.

Häsde dech schonn op dat jecke Hoppeditz-Jedöns vör’m Rothuus jefreut, dann donn doch am Ellfde em Ellfden zohuus en CD von de „Fetzer“odder „AltSchuss“opläje on flöck häsde Karneval en de Kösch. Leewer drenne alleen als wie drusse met Corona!