Bohei öm dat Ei

Morje es dä Osterhas als widder en Huus on Jahde am erömhoppele, on öwerall es Bohei öm dat Ei aanjesaht. Ei on Ei es lang nit datselwe, keens süht us odder deht schmecke wie et angere: Mini- odder Kawenzmannseier, hohle Eier met nix dren odder Kallorijebombe, met Föllonge, die et en sech hannt.

Jede Jeck es angers, also jedem e anger Ei, söns künnt mr Ostere en de Famillich mem falsche Ei fies donäwe haue. Also kritt Omma Finche e Presentei met en Stronzschlöpp dröm, domet et noh jet ussüht, äwer ki Krokantei, denn se hät fies Maläste met de dredde Zäng. Oppa Bähtes hät mem Söße nix am Hoot on es zofreede met enem Speckspeejelei am Osterfröhstöcksdesch. Dä Papp hät jrad mem Ruuke opjehöht, es sietdäm janz doll op alles, wat söß es on steht jetz op donkele Schockeladeier, äwer bloß met en aanständije Whiskyföllong. De Mamm, emmer op Diät, verkimmelt jrad emol zwei Schampustrüffel-Eierkes, wenn se us de Kö-Confiserie komme. Denne Pänz esset piepejal, wat dren odder draan es am Ei. Hauptsach, de Ostereier send bont on lecker söß. Kleen-Kevin mümmelt aan allem eröm, wat ehm zwesche de Melkzäng kütt, et Jabilein verkimmelt met Jenoss alles, Schockelad, Mahzepan odder Noujat, wie et jrad kütt. Die zwei Ströppkes söhke dä janze Daach en Huus on Jahde eröm öm de Wett, bes se och dat letzde Ei drenne on drusse jefonge hann. Natörlech duurt et nit lang, bes et Jabilein Buckping kritt, nohdäm et janz flöck sin Ostereiersammlong verdröckt hät.

Joot, dat dä Osterhas bloß aan eenem Daach de Eier versteckt!

Monika Voss