Aprel mäkt watte well

Dä alde Spruch es jrad jo so wat von aktuäll on deht em Momäng passe wie lang nimmieh. Dies Johr es dä Aprel met ons fies dä Molli am make! Wie lecker wärm hät dä Monnd aanjefange! Am eeschde Wocheäng hammer em schönnsde Sonnesching drusse op de Terass setze könne, on janz Fröhflöcke hannt direktemang Wööschkes on Kottletts op dä Jahdejrill jeschmesse. Fröhjohrsklamotte wohde aanjetrocke, am Auto hät mr de Sommerriefe optrecke losse on rongkeröm hät mr sech op Fröhleng on Sonnesching enjestellt.

Von wäje! Dä Droom wor äwer flöck usjedröömt. Letzde Woch kunnt mr jlatt jlöwe, dat mr medde em Wenter jewäse wör. Frost, Jlatties on Schnee stungen öwerall op’m Projramm. Fies usselech on lecker kalt met Temperatürkes onger Null zom Bibbere on Zeddere! Ussem Kleederkast mosst mr Kaschmirsöck on Wollmötz widder eruskrose, on däm Oleander em Terracottapott op de Terrass – vill zo fröh noch drusse jestellt - wohd ene Palletoh us Plastickfolie ömjehängt, söns hädden dä Boom sin Blöteziet jetz schonn verjesse könne. Buure on Winzer woren besönders ärm draan. Dä Aprel hät se dies Johr mieh wie kalt erwischt! Janze Appelplantasche solle erfrore sin, on schlaue Winzer hannt nachts sojah Füer zwesche de Rebstöck jemaht, öm et denne e besske jemötlech wärm zo make on domet em Herws Fässer on Fläsche nit leer bliewe. Nu hät ons Aprel et sech för dies Wocheäng widder angers öwerläht. Meteoroloresche Schlauköpp hannt ons jetz zweistellije Plustemperature aanjesaht, äwer kömmer so’nem rösije Aprel traue?

Lommer ons vörsechtshalver noch emol wärm aantrecke, domet mer nit nächsde Woch mem Pips erömloope mösse, wenn et dann drusse endlech doch noch Fröhleng wähde sollt!

Monika Voss