Schlope deht joot
Et jöwt en narelneue Studije, die ons verzällt, dat 8o% von all denne Lütt, die hee on hütt noch en Bürro, Läde odder Fabricke brassele mösse, nachts nit en- odder dörchschlope könne. Se donnt ki Öjelche zo on wälze sech de janze Nacht op de Matratz eröm. (De Statisticker mösse onger’m Bett jeläje hann!) Dat Äng vom Leed süht dann so us, dat mr dann am Daach bei sin Ahbiet als fuule Mödköttel on nit als rösije Wibbelstähz odder Brasselemanes däm Baas bzw. däm Boss opfällt.
Ene schlaue Medikus hät nu owedrop noch erusklamüsert, dat mr pö-a-pö dick, dumm on krank wähde kann, wenn mr zo wennech Schlof hät. Natörlech hätte och trek e Rezepp en de Hangk, wat mr dojäje donn kann. Sech am Daach jede Stress vom Hals halde, owends kinne TV-Thriller aankicke on de Fenger fottlosse von PC, Smahtphon on Täblett. Kin Baldianpille schlocke, stattdesse leewer e Jläske Rodwing kippe. Dat i-Tüppelche äwer es dä nächsde Tipp: Meddaachs soll mr sech e Kawuppdesch-Nickerche, power-nap heeß dat hütt, jönne. En de USA hät ene Boss en sinnem Bürro Kabüffkes installeere losse, domet sin Lütt meddaachs e besske reläkse könne. 1o Menudde ratze on dann deht mr widder en de Häng speue on met Schwong on Schmackes bes owends dörchwulacke. Dat kreatiewe Mänädschment es nu för Bejeisterong am höppe, on sojah de „Financal Times“hät jeschreewe: Schlope em Bürro deht joot.
Lommer öwer dä Tellerangk eröwerkicke on von de USA - on von Spanije sowieso - jet aannähme: Siesta es prima! Wenn mr dat meddaachs traineert, moss dat met de Ziet nachts von janz alleen fluppe.
Monika Voss