Sommer met Schmackes

Dat kann jo heiter wähde! Wenn dä Sommer am 21.Juni schonn met Sahara-Temperature am aanfange es, well mr sech janit vörstelle, wie dann en Steijerong em Juli on Aujust sech aanföhlt.

Nä, nu emol janz ehrlech, för so e Sauna-Wähder semmer Jermane hee nit jemaht! So’n Aapehetz, fönnef Daach hengerenanger, deht ons jetz ussem Hals erushänge wie enem ärme Hongk de Zong. Es mr jetz ene Bleck op dat Thermometer am schmieße, kütt mr doch schonn beem Afläse alleen fies ennet Schwetze. Eemol met de Wimpere klimpere, on mr es klätschnass. Jeht mr morjens kooz vör de Dör de Ziedong erinhole, kritt mr trek de eeschde Hetzewell. Bloß kin Bewäjonge, die nit nödech send. Bloß kin Wulackerei em Huus odder em Jahde! Besde ene ärme Höhsch, dä em Bürro odder söns wo brassele moss, dann äwer bloß pö-a-pö, janz piano, öm Joddes Welle nit met Kawuppdesch so wie söns. Dehsde em Bürro de Ähr-Condischen op volle Pull stelle, häsde am angere Daach en Sommerjripp on kanns dech trek krank schriewe losse. Zohuus mossde bloß nachts de Pootze on Finstere wiet oprieße, och wenn dat kinne Dörchzoch mäkt. Et deht janit trecke, weil de Lofft am stonn es. Sojenannde Wärmduscher dommer jähn verhohnepiepele, äwer jenau dat moss mr jetz donn, säht dä schlaue Medikus.

Alle Johr widder es dä heeße Tipp bei Aapehetz: Nix wie drenke, drenke on noch emol drenke! Äwer bloß fies fad Wasser, e lecker Dröppke sollsde dech eesch verkasematuckele, wenn de Sonn am ongerjonn es. Nu loss jonn, „Sundowner“em Jlas on Prösterke!