Sommerferije fange aan
Dat Scholljohr es eröm, Brassele on Wulacke am Äng, Fuulenze on Ferije make on op Jöck jonn send aanjesaht! Secks Woche Sommerferije send doch dat Schönnsde op de Welt on dat nit bloß för ons rösije Pänz, och för ärme Lährers on jeplochde Eldere. De Blare schmieße nu eesch emol met Schmackes de Scholltäsch en de Eck on könne dat Liere von Jrammatick on Vokabele verjesse, sowie dat Schriewe vom fies komplizeerde Aljebra-Test on Referat öwer däm Kafkas Franz si Läwe on Werk. So’ne Lährer brucht nimmieh Pöngele von Fählers zo söhke, zo fenge on zo korrijeere. Hä moss och nimmieh stondelang hen on her zo simoleere, wat hä däm Jennifer on Justin – Finche on Döres heeß hütt keener mieh – en dat Zeuchniss schriewe soll on wat bloß nit. Denn de schlaue Psycholore von hütt wolle, dat mr bloß noch Positiewes en dat Zeuchniss erinschriewt, domet so’ne ärme Pänz nit trek Depressijohne kritt. Och Papp on Mamm könne dat Kontroleere von Huusopjawe enstelle on sech för Fuulenze parat make. Dat lange Ferijepäuske hannt se sech all verdeent, die met de Scholl zo donn hannt. Aanjefange vom i-Dötzke bes nohm Abiturijänt, vom Huusmeester bes nohm Direckter, on Eldere sowieso. Lommer denne all de Ferije jönne, piepejal wat och op’m Projramm steht: dat Chille op Balkonije odder Piljere dörch Nordspanije, dat Erömkleddere en de Dolomitte odder dat Schnorchele en de Karibick, dä Böötche-Tripp öwer de Ostsee odder dä rabbelvolle Cämpingplatz am Möhnesee. Hauptsach kinne Stress on nix wie dolce far niente, och wenn et nit in Italije es!