Fröher „in“, hütt „out“
Dä Satz deht jo op janz vill passe, wenn mr emol en Erenneronge am schwelje es. Ech denk jrad dodraan, wie mer domols en de Sommerferije met de janze Famillichbajahsch en Italije am Meer ons em Sangk am erömräkele woren, öm op alle Fäll met en Schockeladefärw von Kopp bes Fooß widder aan de Düssel aanzokomme.
Bei Aapehetz en de Meddaachsziet brutzelden Jroß on Kleen am sojenannde „Teutonejrill“on mr kunnt vom Sonnesching de Nas, bzw. de Huut nit voll kreeje. En de Loft loch dä ranzije Rüsch vom Tiroler Nussöl, dat siet Weihnachte em Kosmetickschränkske op dä Sommerurlaub am wahde jewäse wor. Lechtschutzfaktor? Kannden mer nit, bruchden mer nit! Späder hät mr sech met de Firma Piz Buin dä rösije Kakao-Look aanjebrasselt, öm jenau so uszosenn wie dat leckere Mädche op’m Werbeplakat.
Hütt moss mr dat Sonnebade, dat bekloppde Jrille von anno verjesse. En de Medje on beem Huutdockter häsde dech schonn lang schlau make könne öwer Ozonloch, UVStrahlong on jefährleche Sonnesching. Wä well schonn en plisseerde Visasch wie ene alde Indijaner hann odder Melanome op’m Rögge! Nä, hütt es Lechtschutzfaktor 50, dat straffe „Anti-Aging-Skin-Repair“Projramm aanjesaht, domet mr nit wie ene Schrumpelsappel ussüht. Brutzelbraun es „out“on vörnähme Bläss es „in“. Moddels on Mannekängs make jetz janz op Schneewittche on stronze met en Huut wie en Plüschprumm, die noch nie ene Sonnestrahl afjekritt hät.
Mer komme jrad brav blass us de Ferije zoröck, on de Omma fröcht janz baff: „Wo sid ehr denn jewäse, am Nordpol?“