Jlitzere on Jlöhe öwerall
Häsde schonn aan dinnem Azvänzkranz de eeschde Kähz aanjemaht, odder dehsde noch bes am Sonndaachmorje wahde? Hauptsach, et jeht dech e Lecht op, on dat drenne on drusse. Alle Johr widder jeht et loss em Dezämber mem Dekoreere on Illumineere von Huus on Jahde, Finstere on Balkong odder Terass.
Häsde och schonn de Lechterkett öwer de Balkongblomekäst jeschmesse odder henge em Jahde öwer de Zweije vom kahle Mangjolieboom? En ons Nohberschaff deht en jedem dredde Finster ene illumineerde Stähn hänge, wat jo noch erjenswie dezent es.
Äwer et jöwt och Lütt, die noh däm Motto „Mr kann och alles öwerdriewe“Huus on Jahde opbrassele. Do brenne Pöngelche von Jlöhbernches en de Bösch em Vörjahde, Lechterkette send sech wie Boas am schlängele on rengele on öm de Finstere on owe am Dach send kitschije Knallbonbonglämpkes öm de Wett am jlöhe on jlitzere wie jeck. Em Vörjahde von Klömperkamps näweraan es e Renndier ene Kawenzmanssschledde am trecke on jäjeöwer hät dä Primelbecks Pitter en Bambifijur vör de Huusdör stonn, die sojah noch drissesch Watt mieh drop hät. Am Owend kann et schonn ja nimmieh düster wähde, so hell esset rongkeröm! Wör doch jelacht, wemmer domet nit konkureere künnt! Nu ben ech am hen on her simoleere, wie dat Jlitzerjedöns noch zo toppe wör!
Em Baumaat koof ech mech jetz dä Weihnachtsmann Modell Fassadekledderer, knallrod illumineert natörlech, on däm donn ech dann drusse aan ons Balkong hänge, on dä wisse Jlitzerengel kütt drenne aan et Finster!