Brassel mem Boom

Nu hammer se widder, de Tanneboomsäsong. Op jedem Plätzke on op jede Eck kannsde se jetz koofe: Tannebööm en alle Variazzjohne. Barocke Knubbeldötz on spirrije Schlanke „Modell Jotick“, nobele Nordmänner on edele Blaufichte, wiet fott us Skandinavije odder kooz de Eck eröm ussem Sauerland. Natörlech kütt et nit bloß op de „bella fujura“, söndern och op de Kwallität von de Nadele aan. Se solle nit fies piekse, mösse sech aanföhle wie Sammet on flöck affalle dörfe se schonn emol janit.

So’ne Tanneboomkoof es en Wessenschaff för sech. Eejenslech sollt mr doför Forstwessenschaff odder Biolojie stodeert hann. Häsde dat nit, stehsde vör däm Boom-Sortimäng wie ene Ohs vör de Stalldör. Wat för e Prachtexemplar soll mr nu ussöhke, dat och bei de janze Famillich joot aankomme moss. För dä Papp kann dat Dengen nit jroß jenoch sin, de Mamm wör schonn met enem kleene Kurelije zofreede, on de Omma wönscht sech dicke stabile Zweije, weil se bang es, de Kähze künnden ömfalle on dä Boom en Flamme opjonn.

Hät mr dä Prachtboom noh Huus jeschleppt, hät mr dat Jedöns met de Konserveerong am Hals, domet de Nädelches fröhlengsfresch bliewe on nit op de Idee komme, vör Hillich Owend afzofalle. Nix wie erus met däm Dengen op Balkong odder Terrass, wo mr dann dä Stamm erindeut en ene Emmer met Wasser. „Och ene dode Boom kann Doosch hann!“es jedes Johr dä dröje Kommentar vom Oppa.

Met so vill heeße Tipps, kannsde dann jaranteert e Jedecht von Weihnachtsboom opstelle. Oder es üch etwa so‘n Ambrahsch zovill on ehr stellt üch bloß ene Pöngel Nobiliszweije en de jroße Vas? Dat wör äwer fies schad!