Jedöns öm dat Dekoreere

Dä Tanneboom es jekooft, litt op de Terrass on deht drop wahde, dat mer däm erinhole, öm för us so’n eenfache Allerweltstann ene staatse Weihnachtsboom zo make. Jetz jeht dat Palaver en de Famillich loss, wat nu aan dä Boom kütt on wat bloß nit. Op alle Fäll Kähze on kin Elecktrizität! Äwer wie sommer dä Boom dekoreere? Et Trinche-Tatjana es jrad op enem Öko-Tripp on möhd jähn Bio-Plätzkes am Boom bömmele hann. Dä Bähtes-Bryan, jrad us Milano enjeflore, steht op italjänesche Jlaskurele. Kleen-Kevin fängt trek mem Nörjele aan: „Wo bliewe min selwsjefriemelde Strühstähn? Stondelang hann ech en de Scholl doför brassele mösse!“Dä Papp hät et met de Tradizzjohn on well wie jedes Johr däm Oppa selech sin antieke Joldkurele zwesche de Zweije hänge. De Mamm es jrad op en NostaljieWell am schwemme on kann op Lametta on Engelshoor nit verzechte, weil se dat doch fröher als Dötzke emmer op dä Boom schmieße dorft.

Jede Owend jöwt et nu en de Famillich Diskussjohne öm dä Boomschmock, on wat am Äng dobei eruskütt, steht noch en de Stähne. Met e besske Diplomatie künnt am Hillije Owend ene Pätchwork-Boom em Wohnzemmer stonn: Bio-Plätzkes onge, Joldkurele owe, op de lenke Sitt de Strühstähnches vom Rotzech, op de angere Sitt däm Bähtes sin Jlaskurele on öwer all dat, hee on do e besske vom Engelshoor on Lametta. Dat Unikat künnt doch jlatt Tradizzjohn wähde, on domet wör dann em nächsde Johr dat Palaver öm de Boomdekorazzjohn vom Desch.

P.S. Weeßde schonn, wie dinne Boom dies Johr ussüht?