Emmer widder em Jannewar
Alle Johr widder em Jannewar esset bei all de Lütt för joode Vörsätz bloß so am wimmele. „ Met Schmackes on Schwong en dat neue Johr erin“hät sech Alt on Jong op de Fahn jeschreewe, öm met däm neue Johr och direktemang e neu Läwe aanzofange.
Nohdäm de Statisticker, die emmer alles fies jenau wesse, ons en de Ziedong verzällt hannt, dat se 2017 vill mieh Lütt met Öwerjewecht hannt zälle mösse als wie vörher, könne sech em Momäng öwerall de Mucki-Bude, vörnähm jesaht de Fittness-Centers, vör Aanmeldonge koom redde on send lecker rabbelvoll. Jetz mösse all de Neujohrsvörsätz ömjesetz wähde op Düwelkomm-erus, bzw. op Öwerjewechtjank-fott. Met anger Wöhd: Prosecco on Spätburjunger mösse usjeschwetzt, dä Jänsebrode on Rehrögge afjebrasselt on de Speckröllekes von de Weihnachtsplätzkes op’m Trimm-dech-Rädche fottjestrampelt wähde. Natörlech deht et dat janze Jumminastick-Jedöns nit alleen, öm för rongkeröm afzospecke. Ohne fies-fade Diät on Askese, on dat wochelang, kannsde dä Droom von en Mannekängfijur odder ene Six-Päck-Wäschbrettbuck verjesse. Dat heeß also: Charackterstark aan all däm vörbeijonn, wat mr sech bes dato so jähn jejönnt hät: Adschüss Ähdähpeljratäng, Altbier odder Schampustrüffel! Doför bloß Müsli odder e Röggelche met nix drop, jröne Tee on Annanass. Hm, lecker! Dojäje es doch e Schlaraffeland janix!
Ech freu mech schonn janz doll op dat neue Läwe, wenn min Fröhlengsklamotte en XXS locker on lescher öm de Fijur erömfladdere.
Dat fluppt äwer bloß dann, wenn ech vom Kasteie nit schonn noh drei Daach de Nas voll hann!