Klamotte make Lütt

Dat Sprechwohd kenner mer all, on dat nit eesch siet hütt. Jenerazzjohne hannt dä Satz schonn op de Zong jehatt, wenn emol widder eene jejlöwt hät, sech optakele zo mösse, öm för en „bella fijura“zo make. Min Omma selech hät sojah en so’nem Fall en eejene Interpretazzjohn parat jehatt: Klamotte make Kähls!

Dat sech hütt och Mannslütt jähn opbrassele es jo nix Neues mieh. Dat se sech och em Karnevall ene jeckelejante Deu aandonnt, kammer sech jetz och öwerall bekicke. Kostöm on besönders de staatse Unniform lösst sech so’ne Schäng-Pitter sojah vom Schnieder möngkesmoß op Fijur friemele. Dat Dengen kann hä nit von de Stang em Koofhuus koofe! Nä, dat es - wie mr hütt säht - e „no-go“! Besönders so’n Jala-JardeUnniform, die moss wie aanjejosse setze, de Bux lecker spack, domet se en de Stiwwele erinjedeut wähde kann on de Knöpp von de Jack mösse pingelech akkerat draan jenieht wähde, domet de Jack nit schlabbert, äwer och nit wie en Wooschpell ussüht. Doför mäkte och jähn ene Hoope Moppe locker, denn wat nix kost, dat es och nix! Dat hann ech mech jrad en enem Interwjuh em NRW-Radio aanhöre mösse von enem staatse Kölsche Jong. O-Ton: „So’ne Jardest moss sech drenne em Saal on och drusse em Stroßefastelowend kicke losse könne. Met min Unniform donn ech dreimol besser ussenn als wie ohne!“Wenn dat schonn so’ne eitele Jockel us Kölle säht, wat meent denn dann dä Düsseldorwer, von däm se emmer sare, datte sech jähn opbrasselt? „För min Bjutti es mech nix zo düer, Liebche!“Jenau, denn däm Liebche es och ene leckere Jardest en sin elejante Unniform leewer als wie ene Schluffes en de Joggingbux!