Von nix kütt nix
Schlope deht joot. Nit Schlope könne es fies. De Statisticker – hannt die onger’m Bett jeläje? - verzälle dech, dat hüttzedaachs emmer mieh Lütt nit schlope könne on sech stondelang op de Matratz erömwälze.
Nu hannt sech direktemang janz vill Schlauköpp dolle Tipps enfalle losse, wie mr dat Schlopdefizitt vom Desch, bzw. ussem Bett kritt. En Britannje jöwt et för z.B. ene Schloptrainer, dä för vill Moppe met däm Fooßballteam von enem Top-Vereen ene Workshop zom Schlope em Projramm hät: „Three weeks to better sleep“.
Dat clevere Sandmänneke lösst enzwesche nit bloß denne Kickers, och angere Prommis, rubbeldikatz de Öjelches zofalle. Dat Thema Schlope es jrad mieh wie „in“, ohne dat kannsde dech och kinne Lifestyle-Deu aandonn.
Natörlech send de Modeheinis trek op dä Zoch met opjespronge. Op däm Catwalk – fröher Laufsteg – waggelt hütt dat Mannekäng op Highheels em Heiahemp eröm on dä Dressmän mem Kisse onger’m Ärm schmießt sech en dä siedene Püdschama. Sojah dä Morjemantel vom Oppa selech es voll em Trend on erläwt en Renässangs.
En dinnem alde Schlabber-TiShöht kannsde dech natörlech jetz och nimmieh op din düere Boxsprengmatratz erömräkele!
Nä, do send hütt rongkeröm och bei de Bettwäsch Luxuslabels aanjesaht.
Noh däm Motto, wat nix kost, dat es och nix, darf dech beem Thema Schlope nix zo düer sin. Denn de Statisticker hannt nemmech och erusklamüsert, dat mr en sinnem Läwe en Zietspann von 24 Johr em Heiabett verbrengt. Bei der Vörstellong send mech jetz schonn de Oore am zofalle, on dat bes morjefröh. Nacht zosamme!