Nix wie fott met Stress
Schollferije en NRW! Pänz on Pauker, och Mamm on Papp send am höppe vör Freud. Jetz äwer nix wie fott, on dat janz flöck. Doch sojet es flöcker jesaht als wie jedonn. Bevör mr de Huusdör henger sech för 3 Woche zoschlare kann, hät mr eesch noch ene Hoope Stress am Hals. So eenfach es dat Op-Jöck-Jonn nemmech janit. Öm för met joodem Jewesse sinnem Huus on Jahde fott zo sin, brucht et schonn ene Pöngel von treue Schluppe us de Nohberschaff drömeröm.
Hät et Finche-Fiona von näweraan schonn zojesaht, sech öm de Blomekäst op’m Balkong zo kömmere? Stellt dä Primelbecks Pitter bei Aapehetz och jede Owend em Jahde dä Sprenger aan? Kömmer däm Mändy, dat so doll op Huusdiere es, widder dä Käfech met ons Rotzech sinnem Wellesettech Willi en de Häng deue? Hoffentlech schmießt et ons Zebrafischkes jenoch Wasserflöh ennet Akwariom on deht se nit op Diät setze. Au wei, wo es denn bloß ons schlaue Zeddel, op däm all dat am stonnn es, wat fluppe moss?
Aan erjenswat moss mr jo och noch selwer denke! Hammer de Zietuhr von de Lampe so schlau enjestellt, dat se aan- on usjonnt on de Rollos erop- on erafrolle? Domet so’ne Enbrecher denkt, mer wören janit fott on sößen jemötlech vör de Jlotzkest? Hammer och de Ziedong afbestellt? Wenn die 3 Woche lang vör de Dör litt, kütt doch selws dä letzde Dusselskopp von Janow op de Idee, ons emol äwe de Bud leer zo make.
Nä, wat es mech dat för en Ambrahsch, bes mr all dat op de Reih jekritt hät! Fix on fähdech met de Nerwe, bevör et lossjeht, hät mr äwer am Äng de Ferije mieh wie nödech! Monika Voss