Prumme send aanjesaht
Wat well denn die ahl Prumm als widder! Hät minne Papp selech oft jesaht, wenn de Frau Traatschmeier von näweraan de Nohberschaff dörch de Zäng am trecke wor. Ech meen jetz äwer nit Prumme op zwei Been. Ech denk aan lecker blau-lilla Prumme op’m Kooke. Em Momäng hammer Säsong för Prummetaat. Öwerall en ons Bäcker-Buticke kannsde se jetz koofe, on se jonnt fott wie wärme Brötches. Ki Wonder, denn so e Stöckske Prummetaat met Zocker on Zimmet drop es e Jedecht op de Zong.
Hm, mech es jetz hee beem Schriewe als et Wasser en de Mull am zosammeloofe! Dat Stöck alleen es natörlech bloß jet för ene hohle Zang. Dröm sollt mr sech direktemang draan jäwe, zohuus e Kawenzmannsblech för de janze Famillich selwer zo backe, och wenn dat en lecker-fiese Brasselei es.
Denn dat Backe alleen deht et nit. Weeßde, wat dat för en Ambrahsch es, so ene Steen us de Prumm eruszodeue? Din jestylde Fengernäjelches kannsde dann am Äng verjesse. Do es äwer ene Besöhk em Narelstudio mieh wie nödech. Vörbei esset dann och flöck mem Mannekängfijürke, wennde dech jede Nohmeddaach e Stöck Prummetaat, odder och zwei, verkimmels. On ene aanständije Klätsch Sahne drop es sozesare dat „must-have“beem Prummekooke.
Wat soll et, för en Diät hät mr em Ocktober noch Ziet satt, bevör dann de Säsong för Stolle on Spekkelazijus aanfängt !