Herws hammer nu

Siet letzde Sonndaach häsde et schwazz op wiss em Kaländer stonn: Herws hät aanjefange! Beinoh hät mr dat janit merke könne, dat hä op de Matt stung, denn hä hät sech en de Medde von de Woch noch emol ene dörch on dörch sommerleche Deu aanjedonn. Bloß morjensfröh on owends kunnt mr dann drusse schonn e wärm Jäckske verdrare, wenn mr sech kinne Pips hole wollt.

Janz ejal wat för Temperature dä Herws nu för ons em Jepäck hät, däm Sommerwähder mösse mer af jetz adschüss sare. Mäkt nix, denn de Sahara-Temperature hammer jo lang jenoch dies Johr jeneeße könne. Villeech hammer noch ene joldene Ocktober vör de Dör stonn, äwer bes dato hannt sech de Meteorolore, dat send de stodeerde Wähderfrösch, zo däm Thema noch nix enfalle losse. Adschüss sare kömmer nu op alle Fäll och all ons Sommerklamotte. T-Shirts Modell „buckfrei“, Shorts on Bermudas, Flip-Flops on Sandalettches kannsde jetz em Kleederkast janz noh henge packe bes nohm nächsde Fröhleng. Jetz dommer ons eesch emol parat make för en usselije Johresziet. Dat dommer natörlech jähn, denn hee aan de Düssel jöwt et doch nix Schönnderes als sech emol widder besske opzobrassele. Doför brucht mr janit wiet zo loope. Öwerall en Buticke on Koofhüüser kicke dech de neue Herwsklamotte aan, die jähn janz op Rheinesch als „new collection“verkloppt wähde. Es dä letzde Schrei en dinnem Kleederkast noch nit aanjekomme, mossde jetz äwer flöck ene Shopping-Tripp dörch ons Mode-Citty make. Denn en däm spacke Jöppke von anno kannsde dech hee nimmieh kicke losse, wennde en bella fijura make wells. Äwer wenn dech dat piepejal sin sollt, kannsde och de Moppe spare on zohuus bliewe. Monika Voss