Rolle statt Schleppe
Sommerferije am Äng, Scholl jeht widder loss! För janz vill i-Dötzkes hät domet nu och dä beröhmde „Ernst des Lebens“aanjefange. Zom eeschde Mol moss jetz so’ne ärme Pänz liere, wie fies schwer so e Läwe sin kann. Nä, wat mösse de kleene Ströpp nit all met sech erömschleppe! Am eeschde Scholldaach schonn alleen so’n Kawenzmannstüt, die rabbelvoll es, äwer bloß nit met söße Bongbongs on Schockelad – Karies lösst jröße! Leewer schonn dat eeschde Materijal zom Bastele, Baue on Mole, domet dat Abitur jesechert es! Och ohne Tüt hät dat i-Dötzke dann en de Ziet drop met sinnem Tornister noch jenoch zom Schleppe. Apropos Tornister! Fröher wor so’n Scholltäsch us Läder met enem Schwämmche on enem Häkelläppche drusse draan för de Scheefertafel drenne. Dat Dengen hät e Läwe lang jehalde. Hütt schleppe de Pänz ene Tornister us Konsstoff op’m Rögge, dä leer bes zo zwei Killos on voll bes zo fönnef Killos weeje kann. Ki Wonder, dat hütt so vill Lütt öwer Röggeping kühme, wenn se schonn von Kleen op fies schwer am schleppe woren. Nu hät ene öwerschlaue Orthopäde ene jeniale Enfall jehatt. Nix wie fott met däm Tornister! Schleppe adschüss! Doför locker trecke on flöck rolle losse. Ene Trolley för Schollkenger es dat Ei vom Kolumbus! De Pänz trecke eenfach so e Minni-Köfferke henger sech her on hannt dobei direktemang noch dat Jeföhl von Ferije on Op-JöckJonn! Wenn dat kin Illusijohn för ene jlöckleche Schollaanfange es, dann weeß ech et nit!