Souvenirs ussem Hotell
Jrad hann ech jeläse, dat en internazzjohnale Nobel-Hotell-Kett op en nobele Idee jekomme es, och jet zo donn, domet em Ozean wennijer Plastickmöll erömschwemmt. Dröm well mr nu dat janze Plastickjedöns von Duschjel- on Schampongfläschkes em Jästebad afschaffe. Nä, wat es dat schad! Manch raffineerde Lütt nähme schlau e leer Köfferke met, öm för sech em Fönnef-Stähne-Hotell met däm nobele Hygiäne-Sortimäng för e half Johr enzodecke! Koom eener deht sech met däm düere Jratisduschjel afseefe, wat och jlatt pure Zweckentfremdong wör. Denn dat janze Wäschjedöns en Edel-Plastickverpackong es e prima Souvenir, öm domet zo Huus em Jästebadezemmer zo stronze, wenn Besöhk kütt. So’ne Jast vom Typ Raffzang, nömmt natörlech nit bloß Jel on Schampong met. Nä, och Hangkdööker on Saunamantel - natörlech alles em elejante Wiss – wähde en dä Koffer jeschmesse. Dat komplette Badezemmer-Set met däm Logo von enem vörnähme Hotell deht doch zohuus dat eejene Badekabuff trek e besske optakele! Ni zo jlöwe, öwer wat so ärme Hotell-Mänädscher kühme on klare! Nä, wie kammer bloß so dreist öwer de Sträng schlare! Rotzfrech on stickum losse Lütt Klodeckele on Speejele, Plümohs on Matratze metjonn. Ussem Nachtskonsölche wohd sojah mehrmols von janz fromme Jäst de Bibel jeklaut. Dr Vorel afjeschosse äwer hät emol e Janowe-Duo, dat sech nit jeneert hät, nix angeres als ene Fernseher us enem italjänesche Nobel-Hotell stickum eruszoschleppe. Wat mr doch joot verstonn kann: Bruchsde e TV-Jerät met enem Megga-Beldscherm könne dech doch Plastickfläsche on Badepalletoh mem Stronz-Logo drop jeklaut bliewe!