De Jallier send bedröppelt

Wör ons Welt ene Comic, dann wöhden de Lütt op'm janze Jlobus .kriesche. Woröm? Weil dä Franzmann Uderzo, däm mer „Asterix on Obelix“zo verdanke hannt, am letzde Woch en Pariss sin Öjelches för emmer zojemaht on och sinne Stefft us de Hangk jeläht hät.

Sinne Frönd Goszinny hät de Mäuzkes us däm kleene jallische Dorp opjeschreewe on Uderzo hät de Fijure op et Papeer jebraht. Wat woren dat för herrleche Ähdähpelsknolle, on kin römesche Nobelnäskes, die hä däm Asterix on Obelix ennet Jesecht jezeichnet hät! On dä dolle buschije Schnäuz, von däm hütt dä Troubadix von de Höhner us Kölle bloß drööme kann! Dä Helm met Flöjel för dä kleene Wibbelstähz on däm Obelix sin XXL-Schlabberbux met blau-wisse Striefe send escht e modesch Unikat! Nit verjesse kannsde däm Goszinny sinne Satz: „Se spenne, de Römer!“Bes hütt weeß jede Asterix-Fän, wie bang dat kleene Kaff es, dat ehm dä Hemmel op dä Kopp falle könnt. Nit bang send se äwer, däm Cäsar sin Zoldate zo zeije, wo dä jallesche Hammer hängt. Wie amüsant dä Comic-Text alleen och es, däm Uderzo sin Illustrazzjohne send eesch dat Tüppelche op'm i!

Min „hillije“Asterix-Comics hann ech wie en Reliquije en de Kommod verwahrt. En memoriam Uderzo mak ech mech hütt ene Asterix-Owend! Häsde de Nas voll vom Kicke en de Jlotzkest, wellsde met de Famillich och nimmieh Scrabble speele, dann donn doch e besske en din Asterix-Comics erömschmökere. Wocheäng-Tipp!

Monika Voss