Öwerall es Maskeball

So'n rheinesche Frohnatur mäkt jähn alles met wat schön es. Maskeere es aanjesaht. Es dat nit herrlech, wenn mr jetz all de halwe Visahsch henger en Mask verstecke könne? Et jöwt doch nix, wat bloß schleiht es. Mr moss et sech bloß schön kwassele.

Häsde en Knubbelsnas, en scheefe Schnüss odder Hamsterbacke, lösst sech dat Bjutty-Manko jetz prima kascheere dörch de Mask. Mer Frollütt falle dann jähn met enem dolle Make-up för Ojelches Modell Cleopatra op, klimpere met nachtschwatte impere on wahde drop, dat ene staatse Kähl säuselt: Kick mech en de Oore, Kleen! So wie dat anno dunnemols dä Humphrey Bogart en däm Kultfilm „Casablanca“däm Bergmanns Ingrid jeflüstert hät.

Schad es bei däm Maskejedöns, dat mr de Mimick von denne anger Lütt nimmieh kicke kann. Häsde ene Sprenghöppes vör dech stonn odder ene alde Nöttelefönes? Könne solche Oore löje? Hät dä Kähl met de kornblömkesblaue Robert-Redfort-Ööjelches am Äng e Dubbelkinn on nix wie Falde drömeröm? Henger so'n Schnüssjahdeng kann sech äwe vill verstecke, on schöne Oore donnt et nit alleen, dä Rest moss och stemme. Schad es natörlech och noch, dat so'ne Lappe vör'm Jesecht sojet wie e Schnüsskondömche, also en echde Bützkesbrems es.

Alle Lütt, die dech so jähn wie de Franzmänner met enem Bützke lenks, enem Bützke reihts on widder lenks bejrößt hannt, könne jetz bloß noch mem Ellebore aan Ellebore dech bejlöcke on op Tuchföhlong jonn. Schad, dat minne selwsjeniehde Lappe mem Leoprintmuster nit als FFP2 Mask dörchjonn kann! Monika Voss