Abschiedsbriaf an die zwölf Schdämm
Was der Tandler der Sekte noch zu sagen hat
Liabe zwölf Schdämm, jetzt seid’s er also furt. Do wollt i eich zum Abschied scho no a baar Dankesworte nochruafa. Ihr seid’s vor sechzeah Johr ins Ries komma, um oos a Modell-Gesellschaft in ooserm geischdesleera Alltag und oosrer dekadenta Welt vorzumleba. Und i muaß saga, a weng nuigierig war i scho und hab mer gsagt: „Warum soll ma Leit net amole komplett andersch leba lossa, als wia mir’s auf oosre eigfahrne Weg mit osre Inschdidutiona wia Schual, Schdaad, Konzern-Wirtschaft, Handel und Tandler gwohnt sind?
Und datsächlich habt’s ihr oos dia Antwort drauf geba. Dia isch halt a weng anderschd ausgfalla, als wia ui eich des vorgschdellt habt’s. Ihr habt’s zoigt, dass ui oo net anderschd drauf sin als andre: O bei eich fromme Hippie-Nochfolger hom si a paar rauskrischdallisierad, dia wo Machdgelüschde ghabt hom und der Masse oobedingt saga wolltad, wo’s lang got. Grundlage war genauso wia in andere Syschdeme a Ideologie, in deam Fall a zammbaschdelte Ersatz-Religion. Irgendwann amol hom a baar von deane selbschd ernannte Chefs zum schpinna agfanga, persönliche Schwächa wia da Hang zur Gewalt isch mit dr Fruschdration do drüber zammgfalla, dass es langfrischdig doch nix drmit wird, a ganza Gesellschaft nui zum erschaffa und zum beherrscha. Dann reagiert ma si halt an di Schwächschde, dia wo man no unter dr Fuchtel hot, ab, in uierm Fall di Kinder.
Drmit habt’s ihr oos einiges vor Ooga gführt: Ui hont zwar a Botschaft an di Welt ghabt, dia aber kaum verbreitet außer in Geschprächsrunda in eierm Kaffee in Närle. Des hot ma allgemein, also i scho oo, als recht angenehm empfunda, dass ui net penetrant missionierd und di Leit in Ruah glossa hond.
Heit woiß ma’s besser: Eich isch’s net um di Ruah von di Leit ganga, sondern ui wolltad eier Ruah haba, weil ihr ebbas zum Verberga ghabt hond. Bei dr nächschd Sekte wiss mer’s besser, deane werad mir in beschder Riaser Manier gscheid auf da Zahn fühla. Wann’s no Zulauf zu sodde Utopischda gibt – ui hont Familia ja net grad zu soziale Experimente ermuntert, dia wo für di Eltra vor Gericht und für di Kinder in Heime und Pflegefamilia endat.
Und no was hommer von eich glernt: Dass oser Schdaat, der zwischadurch in dr Schualfroog sogar no vor eich eiknickt isch, doch no schdark gnua war, dia Kinder aus eire Horror-Prügel-Keller rauszumholla. Weil, seit letschdm Johr isch dia Froog bsonders laut wora, ob si oser Demokratie gega Wirrköpf im oigna Land und überall auf dr Welt durchsetza ka. I will eier Häufle ja net glei mit Reichsbürger gleichsetza, aber di Ablehnung von oosrer beschdehenda Ordnung honder prinzipiell scho mit deane gemein.
Und mit eirer Fluchtaktion habt’ser oos vor Ooga gführt, wo’s anderschwo no hapert: In Tschechia zum Beischpiel, wo ma Kinder no drhoim unterrichta und schlaga deff. I hoff, dr oine odder andre passt oo do auf, dass ui do net widder so a Keller-Parallel-Welt inschdallierad und dass ui ähnlich wia bei oos zum Alass werad, dia Sensibilität für uire Kinder odder Kinder überhaupts zum erhöha.
Ui wissad ja: Notfalls taugt jeder no als schlechts Beischpiel. Dann hot si eier Traum vonrer Vorbildfunktion ja doch no erfüllt.
Der Tandler