Rias first
Der Tandler überträgt Donald Trumps Ideen auf die Region
Neilich isch widder amole dia Weltpolitik bis in mein kloina Lada vordrunga: Z’erschd will a Kundin obedingt dean tolla amerikanischa Schtaub– sauger aus dr Werbung haba. Dann kommad junge Leit und wollad des nuieschde Skateboard, wias grad in Amerika Mode isch; von deam hab i no gar nix gwusst. Wia dann no jemand noch ‘rer PizzaTupper-Box gfrogt hot, wia’s dia amerikanischa Hausfoo scho lang hot, war mir klar: Amerika wird ewig oser Vorbild sei.
Dia groaße amerikanische Ideea wia Demokratie, Kapitalismus und so weiter sin immer scho von Amerika komma. Jetzt isch halt oiner dra, der widder ganz nuie Idea ind Weltpolitik neibringt und nix abrenna losst bei dr Umsetzung. Do greif i jetzt amole deam Trump sein Schdil auf, schprich, i mach mer koine groaße Gedanka, und übertrag seine Idea auf oser Region. Des däd als erschdes bedeita, dass mer oos von dr feindlicha Nochber-Region agrenza und zwischa Donauwörth und Nearle a Mauer bauat – dia wo Donauwörth zahla muaß. Dann gilt’s, oosre regionale landwirtschaftliche Produkte durch Schdrofzöll zum schütza – auf polnische Gäns, holländische Oier und argentinische Schdeaks, überhaupt auf Floisch und Wuschd von außerhalb, werad amole 30 Prozent draufgschlaga, damit osre Baura koi sodde Dumping-Preis-Konkurrenz mehr hom. Riaser Firma werad verpflichtet, Riaser Mitarbeiter eizumschdella, fertig. Mit am pauschala Eireiseverbot für Autofahrer mit AA-Kennzoicha tät mer dia Schdroßa im Rias wesentlich sicherer macha.
Wia gsagt, des sin Idea noch’m Trump-Prinzip, ohne groaßes Nochdenka. Weil, auf da zwoita Blick siggds folgendermaßa aus: A Mauer zwischa zwoi Regiona odder Länder funktioniert nur, wann mas zu am Ring schliaßd, drmit koiner um dia Mauerenda drumrum ka. Des hieß, mir müaßad ooser Rias eimaura, dann wär mer ja abgschottet vom Reschd der Welt. Umkehrt muaß ma saga, dass si dr Trump ja oo selber abschottet mit seiner Mauer – scho alloi von alle Leit, dia gmoint hom, seit 1989 isch’s rum mit Politiker, dia wo Länder mit Maura abgrenza wollad. Schdrofzölle auf Wuschd und Oier? Do muaß ma bedenka, dass des Rias scho längschd zuarer Exportnation gwora isch und technische Schpezialteile, Bus- und Zugsitz, Flugzeig-Elektronik, Aromaschdoffe und was woiß i was no alles in alle Welt verkofft. Wann do jetzt im Gegazug o Schdrofzöll drauf erhoba werad und gar a Handelskriag mim Rias ausbricht? No trag mer oosre Wuschd und Oier aber ganz schea teier zu Markte. Nur Riaser Arbeiter eischdella? Mir hom jetzt scho an Fachkräftemangel und brauchad Leit von außerhalb, genauso wia ma anderschdwo Leit aus’m Rias braucht. Und bloß, weil a paar AA-Autofahrer net gscheid fahra kenna, kenn mer doch net glei alle Leit aus’m Oschdalbkreis fernhalte, do dädad ja scho alloi mir hochgeschätzte Kunda wegfalla, dia wo als echte Schwoba wissad, dass in meim Lada des Preis-Leischdungsverhältnis unübertroffa isch. Kurzum: In osrer vernetzta Welt funktioniert „Ries first“genauso wenig wia „Oberbetzenbach first“odder „America first“. Des kennt i deam Trump amole erklära, wann er in mein Lada kommt. Deff’s a bissle guat ausgreifte Weltpolitik meahr sei, Mischder Präsident?