Die wahren Scherze schreibt das Leben
Der Tandler meint, Späße muss man nicht extra erfinden
Wia i do neilich meine Lebensweisheita widder in dr Zeitung ageba hab, vrzählt mer oiner von di Redakteure von am Aruaf von rer Leserin: Was denn jetzt do am erschda April dia Zeitungsente gwesa sei, wollt’s wissa. Des hot ma gar net so richtig rauslesa kennt, hot’s g’sagt, es hot halt alles so glaubwürdig klunga.
Des hot an ganz oifacha Grund g’habt, hot dr Redakteur drauf g’sagt, es war nämlich alles glaubwürdig, schprich wohr. Oser Heimatzeitung bringt scho seit etliche Johr koine Falschmeldunga zum erschda April mehr, weil dr Leser si drauf verlosst, dass alles, was in dr Zeitung schdodt oo wohr isch. Und heit, in dr Zeit von „Fake-News“, also bösartiger Irreführung, und von Pobulischda, dia wo grundsätzlich gega alle Media wettra, sei des wichtiger denn je.
Mei, luschdige Sacha sin scho passiert, wia ma dia Leit no öffentlich in da April gschickt hot. Wann i nur an dia Fotomontasch von deam ageblich bei Harburg geplanta Schdaudamm denk, der wo mindeschdens des halbe Rias unter Wasser gsetzt, aber di Schdromversorgung gsichert hätt, muaß i heit no lacha.
Manchmol sin dia Aprilscherz sogar wohr gwora – wia dia nagelnuia Nearlinger Umgehungsschdross abgsackt isch, gschperrt war und bloss no für Skater an Wert g’habt hot, isch in dr Zeitung zum erschda April a Volksfeschd mit Wieschdleskiosk, Biergarta und Skater-Volkslauf akündigt wora. A junger Wirt hot’s glesa, dia Idee umgsetzt, mit seine Freind Bierbänk, Grillbude und Bier nauskarrt und tatsächlich sind hunderte Leit von AprilscherzOpfer zu Volksfeschdbesuacher gwora.
Aber wann ma genau naguckt, hält des Leba ja regelmäßig luschdige Begebaheita bereit, wo nix meahr drzua erfinda brauchsch. Zum Beischpiel Nama, dia wo so guat bassad, dass des eigentlich gar koi Zuafall mehr sei ka: Dia Wuch war a Artikel über Frühjoohrsmüdigkeit in dr Zeitung, und wia hot dr zitierte Schloofmediziner ghoißa? Dr. Faul.
Do passt’s endlich, weil zu ooserm Oberburgermoischder Faul bassd dr Nama ja wirklich net; genauso wenig wia zur Metzgerei Schlecht, wo di Leit am Samschdag faschd bis off’d Schdross naus Schlange schdanda. Neidlos muaß ma aber Donauwörth da originellschda Namenstreffer zuagschdanda, nämlich dia Fahrschule Schrott.
Der Tandler