Luschd auf a Runde Wetter-Bingo?
Das Aprilwetter brachte den Tandler auf eine Geschäftsidee
Igloob, in di letschde zeah Johr hot der Ausdruck „Aprilwetter“nia so guat passt wia heier. Am Dienschdag hab i bei am Blick in mein Garta vormittags Schneaflocka und Boomblüate nimme ausananderhalta kenna, nommitags isch widder des schdrahlendschde Sonnalicht in dia Blüata neigfalla. Im Gschäft hom si meine zwoi Verkeiferinna regelrecht in d’ Hoor kriagt, was ma am Samschdag für a Sonderaktion macha sollad: A „PolarPaket“mit Labello, Flachmann, Hüttagaudi-CD, Glühwein und zuagehöriger Thermoskann für’s unerwartete Pischda-Wochaend odder a Hawaii-Badetasch mit FlipFlop-Schlorpa, Sonnacreme, Indiaka-Schpiel, Wasserball und fertig gmischda Pina-Colada für da earscda ausflug an da Baggersee. Faschd jeder Kunde, der wo komma isch, hot si eigmischd und sei oigna Wetter-Prognos ageba odder Internet-Vorhersaga von Wonne-Sonne bis Schneechaos zitiert. Wia dann oiner gsagt hot: „Des isch ja des reinschde Wetter-Bingo“, isch bei mir dr Groscha gfalla und i hab dia ultimativa Aktions-Idee ghabt: Wetter-Bingo. Ui wissad ja, wia Bingo got: Du hosch a Kärtle mit feefazwanzg Zahle in feef Roiha und nochanander werad oinzelne Zahla aufgruafa. Wann a aufgruafne Zahl auf deiner Kart schdodt, krizelsch dia a, wann feef Kreizla quer, hoach odder diagonal in oiner Roih hosch, schreisch „Bingo!“ und hosch gwonna. So, und bei mir im Lada gibt’s koine Zahla auf dia Karta, sondern Wettersymbole, also a Schdrahlesonn, Sonn mit Rega, Rega ohne Sonn, Schnea, helle Wolka, schwarze Wolka. Drei mol am Tag ziagt koi geringerer wia dr Petrus dia GewinnSymbole, in meim Schaufeschder zoig i auf am Plakat aa, was vormittags, mittags un nommitags des hauptsächlisch vorherrschende Wettersymbol war. Di Leit mit di Bingo-Karta kenna dann jeda Tag vorbeikomma und ihre Wetter-Treffer akreiza. Natierlich richtat meine Verkeiferinna oo a zeitgemäße Wetter-Bingo-App ei, dass net jeder laufend vorbeigrennt komma muaß. Ab’m zwoita Dag, wann fünf Symbole und meahner beinander sind, wird’s dann schpannend und wer als earschder sein Bingo-Schein mit fünf Kreizla in oiner Roih bei mir abgliefert hot, kommt mit seim Bild im „O“von am groaßa-BingoSchriftzug in mei Schaufenschder und ka si als Preis wahlweise a Polar-Paket odder a Hawaii-Tasch mitnemma.
Do kasch widder amole seha, dass a guater Gschäftsmaa aus jeder Noat a Tugend, schprich, a Gschäft macha ka. Soll nommol oiner saga, i wär bloss a Schea-Wetter-Tandler.