Sicher isch nur, dass nix sicher isch
Der Tandler warnt vor einlullenden Prognosen
Mei Wetter-Bingo, wo i Wettscheine mit Wettersymbole schdatt mit Loszahla verkoff, isch a Riesaerfolg. Es macht an Heidaschpass – außer deane ganz Schlaue, dia wo si letschta Wuch gweigert hom, Karta zum nemma, mit deane si auf Schneefall tippt hättat, weil Schnea ja scho war und kurz vor Mai wohl kaum nomol mit Schnea zum rechna sei. Tja, dia Prognose isch am Mittwoch zammabrocha und hot zoigt, dass ma net auf Prognosa setza, sindern si auf alle meegliche Meeglichkeita eischdella soll. Des wird für oos im Superwaljahr bsonders wichtig und derzeit siggt ma a typischa Prognose-Falle mit dr Präsidentawahl in Frankreich: Do feiert ganz Europa dean kloina Vorschprung, dean wo der Europa- und Demokratie-freindliche Macron vor der rechtsextrema Le Pen hot. Alle duat grad so, als hätt der Macron dia bevorschdehenda Schdichwahl scho gwonna. Und, was isch der Effekt bei so was? Viele sagad si dann in Frankreich: „Was brauch isch ge’en su di Wahl, wenn es Macron schon ‘at geschafft?“Dia ander drgega kämpft wia a Löwin um jeda oinzelna Schdimm und losst koin Nicht-Wähler in ihrm Lager durchganga. Und dia, wo si in Sicherheit wiegat und vielleicht no wegs’m schlechta Wetter von dr Wahl drhoim bleibad, koschd deam Macron vielleicht dia entscheidende Schdimma. Vor am Johr no hätt ma no g’sagt, des isch sowieso undenkbar, dass a Rechtsextreme nakommt, dia wo Frankreich vielleicht aus der EU nausbugsiert. Do hot ma ja oo net prognoschdiziert, dass d’r Trump Präsident wird und der Brexit kommt. Heit isch oifach alles vorschdellbar.
Wann jetzt oiner sagt, dia Franzosa gangad oos doch nix aa, no muaß i oifach saga: Heit got jeden alles aa. Weil, Rechtspopulismus isch oifach weltweit a Phänomen und gottseidank formierat si oo weltweit endlich dia bisher Gleichgültige und Politikverdrossene drgega. Und bei oos beschdodt dia gleicha Gefahr, dass si Viele von irgendwelche Prognosa widdr eischläfra lossad in ihr’m grad aufgwachta Politik-Bewusstsein. Wann ma zum Beischpiel aguckt, wias grad bei dr AfD zuagot – Petry kaltgschdellt, Höcke kommt gar net erschd zum Parteidag, alle recht verschdrieda – no kennt ma oo leicht saga: „Dia sin erledigt, do kemmer oos widder beruhigt zruckloina.“Aber erschdens ka oo dr verschdriddenschde Haufa widder auf’d Fiaß falla und zwoitens hot dia AfD ja net des Monopol auf Demokratiefeindlichkeit. Und scho isch alles ganz noh bei oos: Drei „Reichsbürger“sin am Schdück im Nearlinger Amtsgricht verurteilt wora, isch dia Wuch in d’r Zeitung gschdanda. Überall sind also aggressive Demokratie-Gegner aktiv und überall muaß ma drgega halta. Also: wachsam bleiba und net von wohlgefällige Prognosa eilulla lossa. A propos: Es sind no Wetter-Bingo-Karta mit Schneesymbole erhältlich. Und Europa-Fähnala für Fenschder und Vorgarta hätt i oo no günschdig im Agebot.