Leider unverkäuflich: Zivilcourage

Noch mehr als klare Worte liebt der Tandler mutige Taten

Der Tandler

Oi seltenes Gut, von deam ma nia gnuag haba ka, kännas bei mir im Lada leider net koffa: Zivilcourage – dia hosch odder die hosch net. Haba duat’s auf jeden Fall dia Froo, wo im März auf offener Schdross dean Dieb von ihrm Bua seim nagelnuia Fahrrad gschdelld hot.

Wia des jetzt vor Gricht komma isch, war sogar der Richter ganz erschdaunt, wia resolut dia Nearlingerin offabar aufträta isch: A Wuch nochdeam des agschperrte 1000 Euro teire Montainbike ihr’m Bua direkt vor dr Schual gschdohla wora isch, hot’s exakt des gleiche Rad in dr Schdadt vor am Schoofeschdr schdanda gsäha. Do dädat si andre scho in’d Hos scheißa und frooga: „Wann jetzt der Dieb kommt, immerhin a Krimineller, was macht jetzt der mit mir? Vielleicht wehrt er si ja, wann i was sag und schlagt mi zamm?

D’Polizei kaa i ja oo net ruafa, weil, wann’s doch net ooser Rad isch, bin i blamiert.“Dia Froo hot ungeachtet jeglicher krimineller Energie der Gegaseite oifach gwartet, bis der 18-jährige Kerl komma isch und hot’n gschdelld: „Wo hosch’n des Rad her?“, hot’s’n gfrogt und wia er recht bleed gschobt hot, hot’s gsagt: „Meim Bua isch genau so oins vor ‘rer Wuch gschdohla wora.“

Dia Froo hot wohl a dearmaßa eischüchternda Ausschdrahlung an da Tag g’legt, dass der Kerl sofort innerlich eibrocha isch, alles zuageba hot und si von der Froo glei zur Polizei hot bringa lossa. Des war sei Glick, weil wega seiner Eisicht (i däd saga, wega seim Schock), hot’n dr Richter mit’rer milda Schdrof drvo komma g’losst. An andrer Schdell siggt ma, dass Zivilcourage no a weit gröaßara Bedeitung haba ka, als an Fahrraddiebschdahl zum regla. Auf’m G-20-Gipfel in Hamburg isch’d Polizei von Verbrecher völlig überraschd und förmlich überrollt wora. Dia Polizischda hom si wacker g’halta, aber von gwinna ka koi Red sei. Es hot mi oo a weng verwundert, dass nur feefasiebzg odder so von deane hunderte Gwalttäter aklagt wora sin. Und wer schafft dia Beweisgrundlage, versorgt di Sonderkommission mit Zeugaaussaga, Film- und Fotomaterial, sodass vielleicht nachträglich no andre dra kommad, dia wo grad unvermummt zum seha sin?

Richtig, dr zivile Bürger von dr Schdross. Und des isch genau so a Zivilcourage, als wenn’s dia Verbrecher direkt agriffa hättat, weil, wann oiner verurteilt wird, ka er anhand von deam Material ja vielleicht seha, von wo aus er aufgnomma wora isch und do draus eventuell schliaßa, wer ihn gseha, gfilmt oder fotografiert hot. Jedafalls siggt ma an dera Situation in Hamburg, dass es oft net ohne Zusammaarbeit von aufrichtige Bürger und Polizischda got. Des muaß halt bei am gsunda Mittelmoß bleiba, also oinerseits net zur Selbschdjuschdiz ausarta, andrerseits oo net mit am Schulterzucka ignoriert wera. Ausgewogaheit isch do entscheidend leider muaß ma des selber für si entscheida; dia richtige Wooga drzua hab i oo net in meim Lada.