Deining oifach evakuieren
Der Tandler hat die Lösung für die „Autokalypse“in Deiningen
Igloob, des hab i in meim Leba non et erlebt, wia üaber oin oinziga Ort dia „Autokalypse“, also der gefühlte verkehrstechnische Weltuntergang, so reibrocha isch wia über Deining zur Zeit. Des muaß ma amole schaffa, dass inrer Region, wo zwoi Bundesschdraßa die Lebensadra bilda, boide Adra aklemmt wera und a Bypass über oi oinzigs Dörfle gleitet wird. I will mer des jetzt schpara, über Schdroßaplanung zum referiera, weil, in deane Ausmaße ka des ja koi Verseha gwest sei. Aber wann des geplant war, müaßd ma halt scho oo des Schicksal von deam hoimgsuachta Dorf in dia Planunga mit eibeziaga. Und wia sehad solche Planunga aus für Orte, dia wo gezielt ‘rer Kataschdrophe ausgsetzt werad, zum Beischpiel, wann sia auf oimol aufm Grund von am planta Schdausee liegat odder si Braunkohle-Bagger immer näher fressad? Genau, do gibt’s nur oins: Evakuierung. Jetzt muaß ma ja ned glei ganz Deining umsiedla, der Ort wird ja net zerschdörd. A Zeit lang dia Leit aus dr Schdresszone wegbringa langt ja oo scho. Moment amole – a Zeit lang dr Schdresszone entflieha – des härt si ja wia Urlaub aa, oddr? Freilich, des isch’s doch: Es gibt Abteilungsurlaub, Betriebsurlaub – warum soll’s net oo an Dorfurlaub gäba? Immerhin gh’ärt des ja wohl oo zu di Planunga drzua, dass dia konzentrierte Schdroßabaumaßnahma über’d Feria ganga, wo trotz allem no am wenigschda los isch. Als Verantwortlicher führt dann des Schdroßabauamt oo glei dia Massa-Urlaubsplanung durch: An dr Adria odder dr Côte d’Azur an Hotelkomplex für guat 1800 Leit buacha (do gibt’s an gscheida Rabatt), absolut bauschdellafreie Afahrtsweg ausarbeita, Busse für dia Leit amieta, dia wo selber net fahra kennad (Deining isch ja als seniorafreindlich bekannt) und ab got dia Poschd. I schdell mer do als Nebaeffekt a unglooblicha Feschdigung von dr Dorfgemeinschaft vor, wann oi Dorf im selba Hotel Urlaub macht. Wer woiß, wia viele heimliche Teenager-Pärla dann endlich amole zu am Urlaub unter oim Dach kommad, ohne, dass dia Alte des Geringschde merkad? Version Nummer zwoi, net ganz so gesellig: Des Schdroßabauamt macht an Exklusivvertrag mit deara Hotel-Suachmaschin Trivago, dia wo aus oiner Million Hotels abbl dia günschdigschde raussuachad, und organisiert kloigruppaweise Teil-Evakuierunga. So odder so, drei, vier Milliona dürft dia ganza Aktion scho koschda. Aber jetzt froog i ui: Was sind heitz’tag scho drei Milliona Mehrkoschda im Bauwesa? G’schobad des THG a, wo’s amola gschwind nommol um neun Milliona teirer wora isch. Wann ma do glei dia ganza Schual platt macht und nui baut hätt, dia Schüaler in dr Bauzeit über dia Feria naus in am Luxushotel in Südfrankreich odder so unterrichdet hätt, wär ma, moin i, abbl no billiger wegkomma wia mit deam ewiga Rumgebaschdle.
Vielleicht däät si’s do langfrischdig lohna, wann dr Landkreis angesichts immer monschdröserer Bauprojekte a oign’s Hotel in am Urlaubsparadies betreiba däd. Wann grad koi Dorf-, Schual- odder Hochwasser-Opfer-Evakuierung oder Flüchtlingswell ag’sagt isch, ka ma’s ja gewinnbringend ganz normal betreiba, natierlich mit Vorzugspreise für Donau-Rieser.