Wenn hinten zuviel rauskommt
Der Tandler weiß, wem man nichts vormachen kann
Momentan hot dia ganza Welt a Riesaproblem mit dr Wohrheit. Net umsoscht isch „fake news“, eigentlich a Modebegriff, mit deam gezielt verbroidede Falschmeldunga gmoint sin, in da Duda aufgnomma wora. Längschd isch des koi Schpass mehr von irgendwelche Gaudi-Burscha am PC; Wahla und Weltpolitik werad do drmit beeinflusst. Und es isch erschdaunlich, wia schwer ma si duat, o gigantische Betrügereia zum erkenna: AbgasSkandal, Diesel-Skandal, AutoKartell-Skandal – koi Behörde will do jahrzehntelang irgend ebbas gmerkt haba. So, und jetzt kenn i aber a Behörde, deane kasch nix vormacha: Ooser Finanzamt in Nearle und Donauwörth. Dia sin vor oiniger Zeit am Wirt draufkomma, dass er Schduira in sechsschdelliger Höhe unterschlaga hot. „Ja, des isch doch koi Kunschd“, werad dr jetzt saga, „des woiß doch jeder, dass ma bei am Wirt nur vergleicha muaß, wiaviel Bier und Schnaps er eikofft und wiaviel er ausgschenkt hot.“Noi, sooo oifach war’s in deam Fall net, do hom dia Finanzleit scho raffinierter schaffa müaßa; ma ka durchaus von detektivischam Talent reda. Draufkomma sinds m letschtendlich mim Klopapier. Wiaviel seine Gäschd do verbraucht hom, war oina von deane Agaba, dia wo der Wirt wahrheitsgmäß gmacht hot – er wollt ja sei ganzes Klopapier von dr Schduier absetza und Gwinn, dean wo er hätt verschduira müaßa, macht er ja net drmit, hot er si denkt. An was er net denkt hot, war, wia sorgfältig des Finanzamt seine Plausibilitätsprüfunga macht, also dia Gegarechnunga, ob des, was vorna eigschpeist wora isch, mit deam, was zum Schluss hinta rauskommt, übereischdimmt. Ja, und in deam Fall war do oifach a zu groaßa Dischkrepanz do zwischa ageblicher Ursache und nochgwiesner Wirkung vom Konsum. Und wann’s Finanzamt erschd amole so a Missverhältnis gwittert hot, findas da Grund, wia der Fall ja bewiesa hot. So, und do wär mer eigentlich scho bei meim Rückschluss, dean wo i aus dera ganza Sach ziag: Bei Abgas- und Dieselskandal got’s ja oo um a unsaubers Verhältnis zwischa deam, was vorna neilofft und hinta rauskommt. Wärad do oosre regionale Finanzbeamta net genau di richtiga, um do jeda Unklarheit reschdlos aufzumschpüra? Dia sind ja offasichtlich deitlich mehr motiviert, als wia alle Bundesbehörda zamma, um jeds no so kloine unsaubere Gschäft aufzumdecka. Und als relativ kloina Behörde sind’s vielleicht weiter weg von relativ groaße Lobbyischda, dia wo vielleicht Eifluss nemma kenntad auf a saubera, schnella und gründlichera Aufklärungsarbeit. Ma woiß es ja, dass kloine Leit zuweila gewissahafter schaffad wia groaße und „gewissahaft“oo a weng wörtlicher nemmad.
I persönlich hab ja nix zum befürchta, weil i a aschdändiger Schduierzahler bin. Aber um Missverschdändnisse zum vermeida, rechne i jetzt scho grad durch, ob dia abtretne Fuaßabschdroifer vor meim Gschäft, die wo i in di letschde Johr von dr Schduier agsetzt hab, oo wirklich zum Kundaaufkomma passad, was meim Umsatz entschpricht. D’r Tandler