Dia Schdroßa entlaschdra

Der Tandler hat eine Lösung für alle Verkehrsprobleme

Sganze Rias jammert grad über dia Bauschdella, wo zum Doil oi Umleitung in’d andra neiführt, Tourischda aus Verzweiflung zu Dausende in Möadi durch da frischa Teer brescha, oddr Deining in dr „Autokalypse“versinkt. „Wann’s nur amole rum wär“, jammrad alle. Wissad d’r was? Des wird nia rum sei. I hab’s neilich selber erlebt, wia i mi widder amole über’n Riasrand naustraut hab. 300 Kilometer bin i do auf dr Autobahn gfahre, na und widdr zruck. In vier Schdaus bin i neikomma, a guads Drittel von dr üblicha Fahrzeit bin i auf Bauschdella rumgschdanda, dia wo durch Unfäll odder Markierungsarbeita blockiert warad und hab mer zum Troaschd im Radio Verkehrsmeldunga von andre Autobahna ag’höart, wo’s no schlimmer war. Und do isch mir klar wora: Des heard nia auf. Weil, wann’d mit dr oina Bauschdell fertig bisch, hosch zwar a schea ausbauta Schdroß odder Autobahn mit was woiß i wiaviele Schpura. Aber des Gebaue macht ja nur an Sinn, wann des nächschde Schdroßaschdück genauso schea ausbaut isch. Also programmiert jeda Bauschdell dia nächschde und übernächschde scho vor. Mit andre Worte: Ooser ganzes Schdroßanetz isch a oinziga gigantischa Wanderbauschdell. Und sollt der Dag komma, wo alles fertig baut isch, isch no lang net der Dag do, wo alle Laschder fertig baut sin, für dia wo so verruckt baut wird. Es isch wia mim Has und mim Igel: Der Has isch’d Schdross und wann dia moint, sia hot’s gschafft, hot’s dr Igel, also dia LkwAusschdoaß-Quote, scho längschd überrundet.

Es gingad also drum, dia Laschder von dr Schdroß zum bringa, dass der ewige Kollaps amole aufhört. Aber wo na? Des isch mer oo außerhalb vom Riaskessel eig’falla, wia i amole noch Oogschburg gfahra bin. Wia viele Laschder siggsch und überholsch’d auf dera Schdreck? A paar hundert. Und wia viele Züag siggsch auf dr Bahnlinie neba dr Schdroß? Oin; wann’s zwoi sind, isch des scho a ganz a bsonderes Erlebnis. Und wann oi Sach zu voll und d’andre zu leer isch, drängt si doch oifach dr Gedanke auf, umzumfülla. Also, dia Laschdr auf’d Schiene zum bringa. Net direkt auf’d Schiene, indeam ma dia Roifa abmontiert, sondern auf Transport-Waggons. Dia brauchschd ja net nui erfinda, dia gibt’s ja scho vom Auto bis zum Panzer. Auffahrt-Vorrichtunga wärad oo koi geldverschwenderischa Utopie, a paar so Auf- und Abfahrts-Rampa kasch ja an jed’m Güterbahnhof nabaua.

Ma kennt dia Laschder dann je noch Waraschdrom von Groaßschdadt zu Groaßschdadt auf dr Bahn loffa lossa, zu die Bahnhöf und di endgültige Zielorte fahrad’s dann selber. Für dia Fahrer hängad Persona-Waggons zwischa di Lkw-Transport-Waggons; nochd wär des leidige Problem mit di Ruhezeita oo weitgehend glöst. Schpädr kennt ma ja dann no an Schritt weider ganga - in di Container-Häfa dia Container direkt auf Züg lada und dann an di Bahnhöf noh beim Ziel auf Laschder umlada. Nochd wär sozumsaga ‘d Bahn ausglaschdet und dia Schdroßa entlaschderd. D’r Tandler