Gesunde Sachlichkeit
Der Tandler sieht Gemeinsamkeiten von Schnupfen und Politik
Dia letschda Wuch hab i mi net um mei Gschäft kümmra könna, weil i darniedergeschdreckt war von – ja, do got’s eba scho los, dass i gar net woiß, wia i’s jetzt bezeichna soll. „Erkältung“wär z’weng, „Grippe“a weng z’viel, drzwischa fallt mer nix ei. Meine zwoi Verkeiferinna hom mi bei ihr’m Krankabsuach natierlich glei widder ausglacht und sind mit „Männerschnupfa“drherkomma. Des soll nix andres hoißa als wia, i soll mi net a so aschdella, koi hypochondrische Memme sei, net grundlos rumjammra. Do hab i mit letschdr Kraft an Zeitungsartikel aus dr Schublad von meim Nachtkäschdle gholt, dean wo i exschdra aufg’hoba hab, weil i halt widder amole genau gwusst hab, was kommt. Do drin hot a Wissaschafdlerin (des „-in“isch drbei unglaublich wichtig für dia Objektivität) nochgwiesa, dass Männer tatsächlich schwerer von Vira und so ebbas droffa werad, weil dia Immunzella vom männlicha Teschdoschderon eher bremsd werad, während si si durch weibliches Öschdrogen enorm vermehrad und bei Froa mit groaßer Wucht gega Erkältunge aganga. Mit deane objektive und wissenschaftliche Erkenntisse sin Hohn und Schpott endlich vom Disch, odder besser g’sagt vom männlicha Krankabett.
Genau des hot di Nearlinger PWG oo verlangt. Noi, koi Anerkennung der Schwere vom Männerschnupfa, sondern allgemein meahner Objektivität, schpeziell bei dera Kletterwald-Diskussion. Do habe es zu viel „persönliche Profilierung und Beleidigungen“gäba, schreibat’s. Ja mei, dia Idee war halt so bleed, dass si des Volk massiv zu Wort gmeldet hot und dann wird’s halt scho amole deitlich. Des nennt ma Demokratie, wann si di Leit direkt äußrad. Und wer woiß, vielleicht schpielt des künftig oo auf höacherer Ebene a gräaßara Roll, wann ma si dia quälende Regierungsbildung agschobbt. Vielleicht isch do di Kommune widder amole Vorbild für’s ganze Land. Weil, i moin, was jetzd grad in dera „KoKo“so schpektakulär überlegt wird, hom mir im Nearlinger Schdadtrat und in älle andre Schdadträt scho lang: Koine eizementierte Regierungsund Oppositionsblöck, sondern verschieda schdarke Fraktiona, dia wo si halt wechselnd themaweis zammadua und guckad, dass se si bei bsonders wichtige Thema wia da Haushalt alle mitanander zammaraufad und auf an Konsens kommad. Und genau do hom mir Riaser vielleicht widder amole demonschdriert, was bassiert, wann ma allzu bleede Idäa (i hoff, des isch jetzt net zu politisch inkorrekt für di PWG) net rechtzeitig aschmettert. Do fühlt si dann vielleicht oo des Volk meahner rausgfordert, si zum wehra. A weng hommer dia Entwicklung ja scho g’habt mit deane „Wutbürger“von Schduttgart 21 und so. Do isch schnell dia Gefahr do, dass des in a emotionale Richtung got, wo Radikale mit aufschpringad, dia wo des Thema an sich nimme interessiert. Dia muaß ma dann halt aussondra, so wia dia AfD bei die Regierungsbildungs-Geschpräche ausgsondert wird. D’r Tandler