Weihnachtswünsche der Tiere

Ka nemme saga wo es glesa, en am Tannawald seis gwesa. Viel Tiere stellat se dia Frage, was wichtig isch am Weihnachtstage.

Von alle Länder warads do, von weiter her ond o von gno. Siea redet lang rom om da Brei, was Z’wichtigschte von Weihnacht sei.

Von Grönland war a Eisbär do, der fangt o glei zom Reda a.

Eis muaß gäba ond an Schneea soscht isch des Weihnachtsfescht net schea.

Dr schlaue Fuchs hot se glei gmeldt des bescht isch doch off dera Welt, a’ Gänsebrota, was zom Fressa. Soscht keänt er Weihnachta vergessa.

O ds Reh verrot sein Weihnachts traum, braucht obedengt an Tannabaum, mit Kugla dra ond viele Kerza, nor so gäng ehm des Fescht zo Herza.

Große Oga macht do d Eule ond jommert laut mit viel Geheule. Schummrig muss des Fescht doch sei. Wanns Liacht recht hell, do schlof i ei.

Von weit her komma isch a Pfau, hot Räder gschlaga macht a Schau. A nuis Kloid des tua i net verachta, soscht isch ver mi halt net Weihnach ta.

A Elschter krächt ond schwänzelt rom, ohne Schmuck des wär recht domm! Rengla, Ketta, Broscha, Spanga, isch mei Weihnachtsfeschtverlanga.

A Braunbär isch vo Russland komma, mit tieafer Stemm tuat er laut brom ma, von allam Süaßa nor des Beschte, isch sei Traum zom Weihnachtsfesch te.

Dr Dachs gähnt laut ond furchbar träg.

Schlofa, penna, an alle Täg, des soll mei Fräd an Weihnacht sei. Gähnt – ond schloft glei wieder ei.