A weng mehahner Erleuchtung wia g’wollt
Der Tandler sieht in den Heiligen Drei Königen entlarvende Aspekte
Jetzt
ziagat’s grad widder umanander, dia Schderasinger, dia wo an di Heilige Drei Keenig erinnra sollad. Abber isch ui scho amole aufgfalla, dass dia Schderasinger eigentlich so ziemlich des Gegadoil von Kaschpar, Melchior und Balthasar sind? Erschdens sinds koine alte Gelehrte, sondern junge bis ganz kloine Keedr. Zwoitens bringad’s nix, sondern wollad ebbas. Und drittens rennad’s koim Schdera hinda noch, sondern tragad selbigen vor sich her. Des bedeidet, sia bringad Licht in gewisse Agelegaheita – zum Beischbiel in da Großziegigkeitsfaktor von ganze Schdadtdoil und Dörfer. Wia des got? Ganz oifach: Jeder Trupp sammelt ia Geld für an guada Zweck in am beschdimmda Gebiet. Des wird zählt und regischdriert. Und jetzad kommt’s: Dia Summa und dia zuagehörige Gmoinda werad veröffentlicht! Also i hab zumindeschd von oim Kirchaazoiger dia Bilanz vom letschda Johr vorliega. Und i hab, was mim Internet ganz oifach got, dia jeweilige Eiwohnerzahla rauskriagt und drzuagschrieba, wodurch si wiederum dia Schpendabereitschaft pro Kopf ermittla losst.
Do gibt’s fei a ganz scheana Schwankungsbreite, von 63 Cent bis 1,62 Euro Schpendagelder pro Kopf. Guat, i muaß eireima, dass wia bei jeder Schdadistik grundlegade Verzerrunga vorprogrammiert sin – weil des a katholischer Brauch isch, kommt natierlich do meahner zamm, wo meahner Kathola wohnad; manchmol gangad’s an älle Hausdüra, dann widder bloss vor’d Kirch, dann kommad’s auf Beschdellung. Aber es falld scho oo was andres in’s Oog: Ganz vorna mit drbei isch a Dorf, wo di Schderasinger regelmäßig beirer öffentlicha Veraschdaldung aufkreiza, wo a jeder von viele Beobachter umzingelt isch, si net lumpa losst und scho oo amole an Schein in des Bixle neischiabt – manchmol a weng umschdändlicher wia notwendig, drmit’s oo ja jeder mitkriagt. Scho versuachd dr Nächschde, mit no am gröaßara Geldschei aufzumtrumpfa und di Schpirale der Schpendabereitschaft eskaliert. A guadr Gschäftsma ziagt aus dermaßen klar ermittelte Werte normalerweis seine Erfahrunga und setzt des systematisch um. Auf di Schderasinger-Effektivität bezoga däd des bedeita, dass dia kloine Keenig ihre Sammlunga immer öffentlich durchfiera solldad. Ma kennt ja kloine DreikeenigsSchdandkonzerte veraschdalda und deam Publikum di Schpendabixa unterd Noos halta, in di Pausa von di traditionelle Bauratheater zum Sammla komma odder Ähnliches. Auf zwoi Sacha isch im Rias halt bsonders Verloss: Auf’d Neigier und des Ehrgefühl, si auf koin Fall was nochsaga zum lossa. Beides beim Schpenda zum kombiniera isch oifach a guats Gschäftsmodell.
Und es isch a Gschäft, was si auszahlt, weil des Geld fliaßt doo na, wo’s wirklich braucht wird, in Kinderhilfsprojekte auf dr ganza Welt.
D’r Tandler