Wirtschafts-Lob von berufener Stelle
Der Tandler freut sich über kriminell gute Anerkennung der Region
Dass oser Landkreis und nadierlich ganz schpeziell des Rias als Muschderländle gilt, woiß ma ja scho lang. Ma freed si trotzdeam, wann ma immer widder globt wird für dia praktisch net vorhandna Arbeitslosigkeit, dia robuschde und krisafeschde kloideiliga mittelschdändischa Schdruktur, guada Unternehmensgwinne und draus resuldierenda Wohlschdand. Oft schwingt bei deam Lob no a weng Eigalob mit, wann’s zum Beischbiel von Politiker kommt, dia wo drmit ausdrucka wolla, dass sie ja oo was drzua beidraga hom.
Do duad a Lob von absolut neutraler Seite, wia’s nuilich in dr Zeitung g’schdanda isch, bsonders guat, weil’s halt koi Lobhudelei isch: Gängschder, dia wo si als falsche Polizischda ausgäbad oddr mit Gwinnmitteilunga aufwartad, was natierlich boides auf des Erschummla von irgendwelche VorabZahlunga nauslofft, dia hom si laut Zeitung genau des Rias rausgsuacht; in di agrenzende Dienschdschdella Donauwörth und Dillinga sin koine Betrugsversuache bekannt. Des hoißt, vom Rias verschprechad si si dia fetteschda
Beute, was ganz klar a Anerkennung für oos als wirtschaftlicher Schdandort isch.
Was dia Gängschder nadierlich ned überlegt hom, isch, dass ja von nix nix kommt. Also, dass des scho sein Grund hot, warum der Riasr an sich wohlhabend isch. Der passt halt scho genetisch bedingt von jeher auf sei Sach auf und losst si net von jedm drhergloffna Lumpa bscheißa. Do hotter quasi an natierliche Schutzschild gega jede Art von Überrumpelung: Er sagt z’erschd amole misstrauisch „noi“, dann überlegt er dia Sach sorgfältig.
Do kommt moischdn’s a ideala Lösung raus, dia wo schparsam isch und trotzdem was her macht. Do flaggt zum Beischpiel iebarall im Rias des durch da Metorita selberg’machte Suevit-Gschdoi vor dr Hausdier. Des nemmad dia Nearlinger her, um ihr prachtvolla Kirch drmit zum baua, aschdatt tuiers Baumaterial von soschtwoher zum importiera. Alte Büacher schmeißt ma net weg, sondern macht a Tourischda-Attraktion draus in Form von am öffentlicha Büacherschrank, wo si als FreizeitService jeder bediena ka. Alte Brokat-Vorhäng schmeißt ma net weg, sondern näht für’d Freilichtbühne prächtige Patrizier-Gwänder draus, um dia glanzvolla Vergangaheit von dr oinschdiga Reichsschdadt vorzumführa. Und für da altherbrochta Brauch, Kindrkloidr von Gschwischder auftraga zum lossa, isch ma si oo heit no im reicha Riaser Muschderländle net zu schad – ma bringt dia Klamotta halt zu Kinderkloidermärkt, wo’s dann ihr’n Weg zur nexschda Generation finda und allaweil no zu am kloina Gschäftle guat sin. Also, Leit, haldad dean bewährta Goischd aufrecht und seid’s inschdinktiv misstrauisch gegaieber jedm, der wo irgendwia a Geld von eich will – altbekannte ortsasässige Tandler natierlich ausg’nomma. D’r Tandler