Tandlerskrieg

Der Tandler schlägt gegen Donald Trump zurück

So, jetzt hock i do auf meim Erdnussbutter-Berg und gschoob bleed naa auf da Whiskey-See. I hab mi nämlich ernschdhaft drauf eigschdellt g’habt, dass der Handelskriag mit Amerika pünktlich zum earschda Moi afangt, so wia’s akündigt war.

Und was duad ma als Vorbereitung auf an Kriag? Ma bunkert Lebensmittel. Hab i gmacht und mehrere Tonna Erdnussbutter und a baar Hektoliter Bourbon-Whiskey kofft, direkt aus Amerika. Natierlich net zum Eigaverzehr, jedenfalls ned älles.

I hab mir halt ausgrechnd, dass des Sach tuirer wird, wann Europa im Handelskriag zruckschlagt und auf Harley-Davidson-Motorräder, Levis-Jeans, Bourbon und Erdnussbutter quasi Gega-Schdrofzöll erhebt. Mei Schdrofzoll-freia Ware kennt i dann deitschlandweit per Internet billiger abieta und a MordsGschäft draus macha. Jetzt verschiabad’s des Ganze um an Monat, und am End wird’s doch widder nix, wia scho so viele Akündigunga vom Trump. Aber des loss i mir ned g’falla – i wer als PartisanaTandler mein oigna Handelskriag mit deane afanga. Und zwar schlag i dia mit iahrm Präsidenda seine oigne Waffa, also Twitter und Fakenews. I verbroit oifach Sacha in di soziale Media, dia wo di Amis richtig hart treffad: Dass zum Beischpiel auf’m Oktoberfeschd heier amerikanische Tourischda mit Bier, Bretzga und Weißwieschd boykottiert werad und dass es bayernweit koine Bluad- und Leberwieschd und koi Sauerkraut mehr für Amerikaner gibt. „No more Kraut from the Krauts!“, däd der Schlachtruaf auf Facebook lauta. Oo Läderhosa, Dirndl odder Kuckuksuhra – ällas tabu. Des däd natierlich an Prodeschdschdurm in Amerika auslösa. Und widdr däd i’s macha wia dr Trump un earschd amole a Frischd für des Ganze setza.

Mittlerweile hätt dann oiner rausgfunda, dass dia ganza Kampagne von am kloina Tandler in am gewissa Närla gschdardd wora isch und a amerikanischer Awalt däd mi drauf verklaga, dass i verpflichded wär, Lederhosa, Dirndl und Kuckuksuhra in unbegrenzter Menge ohne Exportquoten noch Amerika zum verkoffa. Irgend wer (voraussichtlich meiner Schweschder ihre Buaba) däd dann twittra, dass ma als Amerikaner beweisa muaß, dass ma si koin Boykott von am kloina deitscha Tandler gfalla lossa deff und jetzt grad erschd rächd haufadsweis bei deam b’schdelld. Und scho hearsch meine Kassa bis in’s Weiße Haus klingla. Des härt si verruckt a? Net so, wia a Mauer zu Mexiko zum baua, koine Moslems ins Land zum lossa odder Nordkorea an Atomkriag azumdroha. Und oo Verruckte kennad nochweislich Milliardäre wera. Also bin i doch auf am guata Wäg, oddr?

D’r Tandler