Royals schdatt Rollbrota
Ist der Tandler ab Mittag wirklich erlöst von der Hochzeits-Hysterie?
Samstagmorgen um elf in Deutschland – was macht ma do normalerweis? Wohnung putza, Hof kehra, Auto raussauga, eikoffa, in der Schdadt durch’d Fuaßgängerzone bummla, noch ‘rer kloina Shopping-Tour beim Tandler gmüatlich an Kaffää trinka. Aber heit wird’s nix mit derartiger deitscher Kulturpflege, sogar dia Küch bleibt kalt. Heit hom widder amole dia Engländer des Saga, der Prinz Harry heiricht sei Meghan und ganz Deitschland hängt vor dr Glotze, di Zewa-Düachar parat fürs Yes-Wort. Endlich, muaß ma saga, weil, i hab’s nimme ausg’halta. Noi, i bin koi Hochzeitsfreak, ganz im Gegadoil. Wahrscheinlich hätt i dia Hoachzat glatt verschlofa, wann i meine zwoi Verkeiferinna net hätt. An Countdown-AbreißKalender mim Brautpaar hom se si über d’ Kass g’hängt, der mi genau auf’m Laufenda g’halta hot, wiaviel Tag es no sin. Was für Schpitza des Brautkloid hot, wia dia erwarteta Kombination von amerikanischem Glamour und britischer Tradition si do wohl niederschlagt, was für Bluama im Brautschdrauß sin und was dia für Botschafta symbolisiera sollad, ob dia Muadr von dr Braut wirklich a Burberry-Kloid tragt, weil’s ja mit am Burberry-Kloidersack auf’m Flughafa gsäha wora isch, ob dr Brautvater noch seim Herzinfarkt jetzda kommt und sei Tochter zum Alter geleitet odder ned odder doch odder doch ned und so weider.
So, dann isch mer der Kraga platzt und i hab mir g’sagt, dass i jetzt oo mein Schpass mit dera Hoachzat haba will. No hab i amole ganz beiläufig in dr Früah dia nuieschda „Frau mit Herz“aus’m Zeitschriftaregal gnomma, drin rumblättert und laut von mir gäba: „Hoppala – Hochzeitstermin muss verschoben werden.“Wia erwartet sin meine zwoi Verkeiferinna in Schockschdarre gfalla. „Meghan vergisst bei Junggesellinnen-Abschied jede Etikette“, hab i weidergläsa, „säuft mit männlichem Stripper um die Wette, setzt sich sein Höschen als Trophäe auf, verkündet auf dem Trafalgar Square das Ende der Monarchie und die Annektierung Großbritanniens durch die USA, erbricht sich bei der Verhaftung in den Helm eines Bobbys und landet voraussichtlich für zwei Wochen in U-Haft.“Weiter bin i nimme komma, weil’s mer do des Heft aus die Händ grissa und boide kündigt hom, wia’s g’merkt hom, dass es a Schpässle isch. Dia Kündigung hom’s widder zruckgnomma, aber zwoi Dag nix mehr mit mir g’redt. Des war eine schier unlösbare Aufgabe, mi widder zum Tandler der Herzen bei deane zum macha, abber i hab’s gschafft: In’rer andra Zeitschrift isch in echt vermeldet wora, dass des Geheimnis um dia Hoachzatstort glüftet isch, dass sie fruchtig und mit Holunderblüten backa wird. No bin i in mei Schdammcafé ganga, hab genau so a Tort in Auftrag gäba und am nächschda Dag meine zwoi Prinzessina „die earschde Royal-Torte auf deutschem Boden“serviert. Scho war i widder als Chef auf Lebenszeit inthronisiert.
Dia Royal-Hyschderie isch ja heier bsonders groaß, weil mir zum earschda Mol seit Jahren koi oigna adliga Hoachzat meahr im Rias hom. Letschds und vorletschds Johr hot’s insgesamt drei Hoachzeita in di Heiser Oettingen-Oettingen und Oettingen-Wallerschdoi gäba. Aber oo huier gibt’s herzzerreißende Parallela zwischa di Riaser und di Royals: D’Meghan isch ja a Amerikanerin und a Bürgerlicha. Des erinnert an vor 82 Johr, wia der König Edward VIII auf’n Thron verzichtet hot, weil er si in dia bürgerliche Amerikanerin Wallis Simpson verliebt hot. Und des erinnert an 1823, als der Fürschd Kraft Ernschd von Oettingen-Oettingen und Wallerschdoi auf sei agschdammde Schdell als Familienoberhaupt verzichtet hot, weil er si in di ooglaublich scheana Gärtnersdochder Maria Crescentia Bourgin verliabt und si g’heiricht hot. Schnüff! So, jetzt muaß i Schluss macha, sonschd schaff i’s nimme zum Koschdümverleih, mein Cutaway mit Zylinder holla. I will ja nochad net wia a ordinärer Bürgerlicher vor’m Fernsäher hocka.
D’r Tandler