Net grad a Jungbrunna für’s Hallabad
Der Tandler verspürt keinen großen Zuspruch für das Nördlinger Hallenbad
Isag abbl zu meine Verkeiferinna, wann’s zum hunderdschda Mol was verkehrt g’macht hom: „Zu was aus Fähler lerna? – dann hätt ja dr Fähler gwonna.“Des ka i jetzt deane Lokalpolitiker, schprich, ‘m Nearlinger Magischdrat, oo saga. So zaudernd und zaghaft, wia si dia Dorf-Burgermoischdr domols zum Almarin g’äußert hom, dean’s jetzt dia Schdadträt mim Nearlinger Hallabad.
Do wird zu jedm Lichtblick glei als earschdes g’sagt: „Der wirft ja an Schatta“oddr „Mei, sooo hell isch er oo widder ned.“Jetzad initiiert ooser Lokalmatador, dr MdB Ulrich Lange, vor deam Hintergrund vom Almarin schpeziell und dr Bäder-Situation allgemein a bundesweites Förderprogramm für dia Sanierung von Hallabäder. Und wia hoißt’s nochd? „Mei, sooo viel sin jetzt dia 200 Milliona aus dem Programm oo widder net, wann ma denkt, wia viel Bäder es gibt.“Odder: „Des macht er ja nur wega’m Landtags-Wahlkampf.“
Mei, es isch halt so in oosrer Politik, dass vor odder in am Wahlkampf mehr Dampf dinna schdeckt als wia drnoch; des gilt für jedn Politiker. Dann hot ma wirklich net dean Eidruck, dass des Hallabad aus am schprudelnda Jungbrunna nui gebora wird. Vialmehr schiabad’s dia Sach umanander wia a hoißes Eisa: Dr Landkreis sollt si halt drmit beschäftiga, hoißt’s. Eigentlich wär des scho a Aufgab’ für da nächschda Schdadtrot, hoißt’s. Und natierlich dia alta Gschicht: Earschd amole müaßad Zahla und Fakta vorliega, bevor mer woiß, was ma moint. Dann gwinnt des vor-sich-Herschiaba an Eigadynamik: Weil jetzt des Guatachta zu Sanierung, Um-, An- odder Nuibau scho widder sechs Johr alt isch, muaß es aktualisiert wera, was halt widder a weng dauert. Earschd amole braucht’s a broida Unterschtützung von dr Öffentlichkeit, hoißt’s, dann kennad dia Politiker o saga, ob sie begeischdert sin. Na ja, genau genomma wär des ja eigentlich dr demokratische Weg und beim Almarin war’s ja oo dia Begeischderung vom Volk und net Zahla und Fakta und scho gar koine lokalpolitische Visiona, dia wo Wella bis in di höachschde Gremia g’schlaga hot. Viel hot oo dia Zeitung drzua beitraga, des Thema auf broide Füaß zum schdella und bezeichnender Weis hot’s des jetzt oo widder doo, indem’s di Läser aufgfordert hot, ihr Moinung zum saga. Prompt isch von Volkes Schdimme scho widder a klare Asage komma: A nuis Hallabad in Kombination mit ooser’m scheana Freibad krischdallisiert si als Grundmeinung raus.
Na ja, im Rias hot des Volk sowieso von Mol zu Mol meahner direkt mitendschieda, von dr Schdromautobahn ieber dean Kletterpark auf dr Marienhöhe bis zum Almarin; der Quader an der Grundschual Mitte isch no in Ärbat. Do formiert si scheints formlos dia GMVP (Gsunda Menschaverschdands-Partei). D’r Tandler