Glicklose Innovationa

Konkurrenzlose Technik ist nicht alles, meint der Tandler

Kein Land ist innovativer als Deutschland“isch neilich ganz vorne in der Zeitung gschdanda. Des Weltwirtschaftsforum hot des rausgfunda. Und immer widder hot ma in deam Bericht wia in viele andre oosern Erfindungsund Entwicklungsgeischd deam Pessimismus, deane Klaga und dr Ozufriedaheit im Land gägaieber gschdelld; so quasi mit deam Unterton: Schdellad eich ned so a, ooser Technik isch doch dia modernschda.

Als ob technische Erfindunga zwangsleifig mit dr ganza Läbensqualität zammahänga däd. Wia des real älles aussiggt, hot mer neilich a Kunde verzählt, der wo älle paar Johr Probleme mit seine Nierasch- hot. Dia innovativa Technik schlagt ja oo im medizinischa Bereich durch – Geräte kennad jeda Millimeter vom menschlicha Körper durchleichta und analysiera, dia Data und Bilder kennad in Sekundaschnelle zu jedm Schpezialischda auf’m Planeta iebermittelt wera, umkehrt ka jeder Schpezialischd live dr Behandlung zuagschaldet wera. Was hot do mei Kunde nochd zum jammra?

Passad auf: Vor oogfähr fuchzeah Johr hot er sein earschda Nieraschdoi rauskriagt. Do isch er dann vier Tag lang im Krankahaus gläga, bis dia Folga von deam Eigriff verheilt wara. So, zeah Johr schpäder hot er widder Nieraschdoi g’habt. Wunderbar, zeah Johr Fortschritt sind ins Land zoga, solld ma moina, no müaßd ja älles no besser gloffa sei. Aber dia Krankakassa hom in deane zeah Johr oo ned gschlofa, dia müaßad ja gschoba, wias des Geld für Forschung und Entwicklung widder reikriagad beziehungsweise wo ‘ses eischpara kennad. Also hot’s fier mein Kunda desmol koine vier Tag Krankabett gäba, oo koine drei und koine zwoi. Oo net oin. An Katheder hot ma’m neigschoba, hoim gschickt hons’n und fertig war’s. Er war oo ziemlich fertig, wia er mit seim Katheder drhoim g’hockt isch. Als Fortschritt hot er des jedafalls net empfunda. Und der war ned dr oizige von meine Kunda, dia wo mer vrzählt hom, wia verlora und agdoi fertigt si si in dr Medizininduschdrie vorkommad.

Und dann gibt’s ja generell no a Schattaseit von älle technische Inveschditiona, net bloss in dr Medizin, im Kommentar näba dera Erfolgsmeldung isch’s schea dargleggd wora: Innovation bedeidet nix andres als wia da Wettlauf zwischa Has und Igl – mir erfindat ebbas, dia andre, ganz vorn drbei China, kopierads halt.

Bis dia dann ihre Kopia billig auf da Markt gworfa hom, müaßad mir des scho widder weiterentwickelt haba, drmit mer quasi für oodrweil ser oigens Produkt scho widder a verbesserts Konkurrenzprodukt bieta kennad.

Immer widder und immer schneller got des, a immer gräaßerer Druck auf dia Mitarbeiter entschdodt, psychische Krankheita werad immer meahner, sogar scho bei di Schdudenda, Begriffe, dia wo’s vor zwanzg Johr no gar ned gäba hot wia „Burnout“sind mittlerweile zu Volksleida gwora. Und do wundert ma si, dass dia heilbringende Innovationa und des leidvolle Jammra Hand in Hand gonn und Deitschland auf dr Läbensqualitätsund dr Zfriedenheitsskala ums Verrecka net noch vorne kommt.