Randbemerkunga

Der Tandler flüchtet derzeit vor Politik und Katastrophen

Ma soll ja net drvo renna, vor deane groaße Thema in oosrer Zeit. Aber manchmol brauch i scho a weng, sag mer amole „Urlaub“drvo. Söder und Seehofer meegat wichtig sei, aber i ka’s jetzt oifach nemme auf der earschda Seit von dr Zeitung säha. Und Kataschdropha wia Junkies als unverantwortliche Ärzt im Krankahaus wachsad si von Dag zu Dag unerträglicher aus – wia wann dia Zeitungsmeldunga ned langa dädat, isch dia Wuch im Fernsäha komma, dass des längschd a flächadeckendes Problem isch mit drogasüchtige Ärzt. Do soll ma auf koin Fall weggschoba, aber dauernd nagschoba macht oin regelrecht krank. Do entschpann i dann scho amole mit di Randnotiza, dia wo si oft herrlich erfrischend läsa. In „Mann bleibt kopfüber im Schacht stecken“schdeckt, wia d’ Ieberschrift im Lokaldoil vermuda losst, außer deam Ma oo no a gewissa Situationskomik, zumol ja koim was passiert isch. Aber wia oiner nochgugga will, ob in am Gulli oo wirklich Wasser dinna isch, er drbei neirutscht und bloss no dia zappelnde Füaß oba rausgugga, des hot scho was. Im ieberregionala Doil von dr selba Ausgab hom mi dann, i sag’s ganz ehrlich, Kurzmeldunga wia „Priester beißt Polizisten“odder „Diebe stehlen tausende elektrische Zahnbürsten“viel meahner interessiert wia auf d’r Titelseit der dausendschde Artikel zum Schdand vom Brexit odder ieber schdaadlicha Schduierverschwendung. Da Vogel agschossa hot für mi abber „Sieben Kamele stehen nachts vor Discounter“, unterlegt mit am kloina Bildle von selbiger Situation. Do loffad richtige Filme im Kopf aa: Deane Kamele war’s also zu langweilig in ihr’m Zirkus und sia sin zu am kloina Schpaziergang aus- beziehungsweise aufbrocha. Sie trottad los und bleibad genau vor am Supermarkt schdanda. Warum wohl? „Do riacht’s noch Dattla“, hot oins beschdimmt in d’r Vorweihnachtszeit bemerkt und andre hom gfrogt: „Wia kommer do jetzt dra na?“No isch oim eigfalla: „I kenn solche Heiser von deam Schild her, weil mer scho oft dra vorbei gfahra sin – do schiabad dia Leit abbl wagawois ihr Fuadr naus.“„No müaß mer ja bloss bis zur Füaderungszeit warta“, hod a anders gmoind, also sinns hald schdanda blieba. Abber schdatt am Fuader-Waga isch zearschd d’ Polizei komma und dann der bleede Wärter, dean wo’s scho kennt hom und der wo’s als Karawane widder hoim brochd hot. Unbedeitender als Politik, aber oifach schea. Ganz vorna war in am Artikel beschrieba, dass ma oft an bessra Zuagang iebers Kloinere zum Groaßa findet: Dia Waldbränd in Kalifornia hot ma jetzt oo scho gnuag gsäha. Aber wias unter „Nicht ohne meine Katze“dia Rettung vom Gottschalk seiner Katz aus dr verbrennta Villa in Malibu beschrieba hom, hot ma scho widder an Bezug zua dera 10 000 Kilometer entfernta Kataschdroaph kriagt. D’r Tandler

Tandler