Impfschdoff gäga Politik-Verdrossaheit
Kolumne Der Tandler findet, diese Wahl hat die Menschen nachhaltig bewegt
So, dear Wahl-Hitchcock-Krimi isch rum, des war monatelang hoachschpannend bis zur letschda Minut und kaum hom si di Riaser so viel mit’rer Kommunalwahl ausananderg’setzt wia huier. In oiner Wuch isch dia Wahl an sich vor lauder Corona scho widder vergässsa. Für mi a guader Grund, jetzt no a weng zum rekapituliera. Wann ma bedenkt, dass demokratischa Wahl ja von Auswahl kommt, nochd war des in Nearle mit feef Kandidata dia demokradischsda OB-Wahl aller Zeita. Dia hom si älle midanandr aschdändig aufg’führt, sin ieber dr Gürtellinie blieba, hom si abber scho schdellaweis grad so viel ananander grieba, dass’ ned langweilig wora isch. A baar kloine Anekdödla hot’s gäba, dia wo weniger als Oorägelmäßigkeita, sondern eher wegs’m Unterhaltungswert in Erinnerung bleibad: Do hot oi Kandidat dia heitz’dag generell g’forderte Haltung zu Ressourca- und Umweltschonung bewiesa, indeam er zu Wahlveraschdaldunga in Nearlinger Ortsdoil mim Fahrrad vorgfahra isch. Jetzt halded si hartnäckig des Gerücht, dasser zwar mi’m Rad VORgfahra, abber ned NAgfahra isch, des hoißt, dass er mim Rad im Kofferraum bis kurz vor’s Ortsschild gfahra isch und dann earschd sei umweltfreindlichs Gefährt auspackt hot. A ieberregionaler Politiker wollt als Wahlkampfunterschdützer in Mauren aufdräda, hot des Dörfle abber mit Mauern bei Rennertshofa verwechselt und isch a weng z’schbäd komma. Bei dr Podiumsdiskussion von oosrer Heimadzeidung isch manche aufg’falla, dass von oim Kandidada ieberdurchschnittlich viele Ahänger im Klöaschderle-Saal warad. D’r
Grund: Oi Ahänger von deam Kandidada hot seine Agschdellde roihaweis zur Ausgabe von dia knappe Eitrittskarda g’schickt und dia Karta an andre Ahänger verdoild. Där Podiumsdiskussion hot des koin Abbruch do, weil des wichdigschde Ziel klar erreicht wora isch: Jeder Kandidat hot, so hom viele Bsuacher hinderher g’sagt, a ganz klares Profil zoigt und genau des Bild von si verschdärkt, des wo ma vorher zum Doil scho erahnt odder aus dia allgemeina Unterhaldunga und Zeitungsberichte rausg’fildert g’habt hot. Und des im Guada wia im Schlächda. Dia Eidrück sin doils verbessert wora, doils hald ned. So hot si im earschda Wahlgang zwar koi Sieger rauskrischdallisiert, abber zwoi klar agrenzte Felder: Ieber 30 odder under 20 Prozent, soscht hot’s nix gäba. Schpannend isch es noch wia vor blieba, was gibt’s oo besser’s als wia a Kopf-an-Kopf-Renna? Was Ieberraschunga abetrifft, do hot Hoaaldheim dia Riesmetropole abber um Länga gschlaga. In’rer Oi-Kandidada-Wahl, dia wo ja grundsätzlich eher langweilig isch, daucht wia aus’m Nichts a zwoider Kandidat auf und schafft’s tatsächlich in a Schdichwahl nei. Des isch genauso einmalig wia dia feef Kandidada in Nearle. Hot genau so an Wahlkrimi wia in Nearle agäba und do drmit dia Leit zua ‘rer no schdärkerer Ausanandersetzung mit dr Politik rausg’fordert. Do brauch’ mer echd ned ieber Politikverdrossaheit klaga und i moin, des politische Bewusstsein beim Oinzelna hot si nochhaltig g’schärft. D’r Tandler